Tattha "abhūtavādīti: parassa dosaṃ adisvāva musāvādaṃ katvā tucchena paraṃ abbhācikkhanto. Katvāti: yo vā pana pāpakammaṃ katvā "nāhaṃ etaṃ karomīti āha. Pecca samā bhavantīti: te ubhopi janā paralokaṃ gantvā nirayaṃ upagamanena gatiyā samā bhavanti. Gatiyeva nesaṃ paricchinnā, āyu pana nesaṃ na paricchinnaṃ; bahuṃ hi pāpakammaṃ katvā ciraṃ niraye paccanti, parittaṃ katvā appamattakameva kālaṃ: yasmā pana tesaṃ ubhinnaṃpi lāmakameva kammaṃ, tena vuttaṃ "nihīnakammā manujā paratthāti. Paratthāti padassa pana Parato peccapadena sambandho. Pecca parattha ito gantvā te nihīnakammā paraloke samā bhavantīti attho.

Desanāvasāne bahū sotāpattiphalādīni pāpuṇiṃsūti.

Rājā "sundariyā aññehi māritabhāvaṃ jānāthāti purise uyyojesi. Atha te dhuttā tehi kahāpaṇehi suraṃ pivantā aññamaññaṃ kalahaṃ kariṃsu. Eko ekaṃ āha "tvaṃ sundariṃ ekappahāreneva māretvā mālākacavarantare nikkhipitvā tato laddhakahāpaṇehi suraṃ pivasi, hotūti. Rājapurisā te dhutte gahetvā rañño dassesuṃ. Atha ne rājā "tumhehi sā māritāti pucchi. "āma devāti. "kena mārāpitāti. "aññatitthiyehi devāti. Rājā titthiye pakkosāpetvā "gacchatha tumhe evaṃ vadantā nagaraṃ āhiṇḍatha `ayaṃ sundarī samaṇassa gotamassa avaṇṇaṃ āropetukāmehi amhehi mārāpitā; neva samaṇassa gotamassa sāvakānaṃ doso atthi, amhākaṃeva dosoti. Te tathā kariṃsu. Bālamahājano tadā saddahi. Titthiyāpi dhuttāpi purisavadhadaṇḍaṃ pāpuṇiṃsu. Tato paṭṭhāya buddhānaṃ sakkāro mahā ahosīti.

Sundarīparibbājikāvatthu.