Abhaye bhayadassino bhaye ca abhayadassino

micchādiṭṭhisamādānā sattā gacchanti duggatinti.

Tattha "alajjitāyeti: alajjitabbena bhikkhābhājanena. Bhikkhābhājanaṃ hi alajjitabbaṃ nāma. Te pana taṃ paṭicchādetvā vicarantā tena lajjanti nāma. Lajjitāyeti: appaṭicchannena hirikopinaṅgena. Hirikopinaṅgañhi lajjitabbaṃ nāma. Te pana taṃ appaṭicchādetvā vicarantā lajjitāye na lajjanti nāma. Tena tesaṃ alajjitabbena lajjataṃ lajjitabbena alajjataṃ tucchaggahaṇabhāvena ca aññathāgahaṇabhāvena ca micchādiṭṭhi hoti, taṃ samādayitvā vicarantā te micchādiṭṭhisamādānā sattā nirayādibhedaṃ duggatiṃ gacchantīti attho. Abhayeti: bhikkhābhājanaṃ nissāya rāgadosamohamānadiṭṭhikilesaduccaritabhayānaṃ anuppajjanato bhikkhābhājanaṃ abhayaṃ nāma. Bhayena taṃ paṭicchādentā pana abhaye bhayadassino nāma. Hirikopinaṅgaṃ pana nissāya rāgādīnaṃ uppajjanato taṃ bhayaṃ nāma. Tassa appaṭicchādanena bhaye ca abhayadassino. Tassa aññathā ca gahaṇassa samādinnattā micchādiṭṭhisamādānā sattā duggatiṃ gacchantīti attho.

Desanāvasāne bahū niggaṇṭhā saṃviggamānasā pabbajiṃsu. Sampattānaṃpi sātthikā desanā ahosīti.