"na taṃ daḷhanti imaṃ dhammadesanaṃ satthā jetavane viharanto bandhanāgāraṃ ārabbha kathesi.
Ekasmiṃ kira kāle bahū sandhicchedakapanthaghātakamanussaghātake core ānetvā kosalarañño dassesuṃ. Te rājā andubandhana- rajjubandhanasaṅkhalikabandhanehi bandhāpesi. Tiṃsamattāpi kho jānapadā bhikkhū satthāraṃ daṭṭhukāmā āgantvā disvā vanditvā punadivase sāvatthiyaṃ piṇḍāya carantā bandhanāgāraṃ gantvā te core disvā piṇḍapātappaṭikkantā sāyaṇhasamaye tathāgataṃ upasaṅkamitvā "bhante ajja amhehi piṇḍāya carantehi bandhanāgāre bahū corā andubandhanādīhi baddhā mahādukkhaṃ anubhavantā diṭṭhā, te tāni bandhanāni chinditvā palāyituṃ na sakkonti; atthi nu Kho bhante tehi bandhanehi thirataraṃ aññaṃ bandhanaṃ nāmāti pucchiṃsu. Satthā "bhikkhave kiṃbandhanāni nāmetāni: yaṃ panetaṃ dhanadhaññaputta- dārādīsu taṇhāsaṅkhātaṃ kilesabandhanaṃ, etaṃ etehi sataguṇena sahassaguṇena satasahassaguṇena thirataraṃ, evaṃ mahantaṃpi panetaṃ ducchindiyaṃ bandhanaṃ porāṇakapaṇḍitā chinditvā himavantaṃ pavisitvā pabbajiṃsūti vatvā atītaṃ āhari:
"atīte bārāṇasiyaṃ brahmadatte rajjaṃ kārente, bodhisatto ekasmiṃ duggatagahapatikule nibbatti. Tassa vayappattassa pitā kālamakāsi. So bhatiṃ katvā mātaraṃ posesi. Athassa mātā anicchamānasseva ekaṃ kuladhītaraṃ gehe katvā aparabhāge kālamakāsi. Bhariyāyapissa kucchiyaṃ gabbho patiṭṭhahi. So gabbhassa patiṭṭhitabhāvaṃ ajānantova "bhadde tvaṃ bhatiṃ katvā jīva, ahaṃ pabbajissāmīti āha. "sāmi nanu gabbho me patiṭṭhito, mayi vijātāya, dārakaṃ disvā pabbajissasīti āha. So "sādhūti sampaṭicchitvā tassā vijātakāle "bhadde tvaṃ sotthinā vijātā, idānāhaṃ pabbajissāmīti āpucchi. Atha naṃ sā "puttakassa te tāva thanapānato apagamanakālaṃ āgamehīti vatvā puna gabbhaṃ gaṇhi. So cintesi "imaṃ sampaṭicchāpetvā gantuṃ na sakkā, imissā anācikkhitvāva palāyitvā pabbajissāmīti. So tassā anācikkhitvāva rattibhāge uṭṭhāya palāyi. Atha naṃ nagaraguttikā aggahesuṃ. So "ahaṃ sāmi mātuposako nāma, vissajjetha manti Attānaṃ vissajjetvā ekasmiṃ ṭhāne vasitvā himavantaṃ pavisitvā isipabbajjaṃ pabbajitvā abhiññā ca samāpattiyo ca nibbattetvā jhānakīḷāya kīḷanto vihāsi. So tattha vasantoyeva "evarūpaṃpi nāma me ducchindiyaṃ puttadārabandhanaṃ kilesabandhanaṃ chinnanti udānaṃ udānesi.