saṅgātigaṃ visaṃyuttaṃ tamahaṃ brūmi brāhmaṇanti.

Desanāvasāne bahūnaṃ dhammābhisamayo ahosi.

Punekadivasaṃ bhikkhū dhammasabhāyaṃ kathaṃ samuṭṭhāpesuṃ "kiṃ nu kho āvuso evaṃ arahattupanissayasampannassa bhikkhuno naṭadhītaraṃ nissāya naṭehi saddhiṃ vicaraṇakāraṇaṃ, kiṃ arahattassa upanissayakāraṇanti. Satthā āgantvā "kāya nuttha bhikkhave etarahi kathāya sannisinnāti pucchitvā, `imāya nāmāti vutte, "bhikkhave ubhayampetaṃ imināeva katanti vatvā tamatthaṃ pakāsetuṃ atītaṃ āhari:

"atīte kira kassapadasabalassa suvaṇṇacetiye kariyamāne, bārāṇasīvāsino kulaputtā pahūtaṃ khādanīyaṃ bhojanīyaṃ yānakesu āropetvā "hatthakammaṃ karissāmāti cetiyaṭṭhānaṃ gacchantā antarāmagge ekaṃ theraṃ piṇḍāya pavisantaṃ passiṃsu. Athekā Kuladhītā theraṃ oloketvā sāmikaṃ āha "sāmi ayyo no piṇḍāya pavisati, yānake ca no pahūtaṃ khādanīyaṃ bhojanīyaṃ, pattamassa āhara, bhikkhaṃ dassāmāti. So pattaṃ āhari. Taṃ khādanīyabhojanīyassa pūretvā therassa hatthe patiṭṭhāpetvā ubhopi patthanaṃ kariṃsu "bhante tumhehi diṭṭhadhammasseva bhāgino bhaveyyāmāti. Sopi thero khīṇāsavo; tasmā olokento tesaṃ patthanāya samijjhanabhāvaṃ ñatvā sitaṃ akāsi. Taṃ disvā sā itthī sāmikaṃ āha "sāmi amhākaṃ ayyo sitaṃ karoti, eso naṭadārako bhavissatīti. Sāmikopissā "evaṃ bhavissati bhaddeti vatvā pakkāmi. Idaṃ tesaṃ pubbakammaṃ. Te tattha yāvatāyukaṃ ṭhatvā devaloke nibbattitvā tato cavitvā, sā itthī naṭagehe nibbatti, puriso seṭṭhigehe. So "evaṃ bhadde bhavissatīti tassā paṭivacanassa dinnattā naṭehi saddhiṃ vicari, khīṇāsavattherassa dinnapiṇḍapātaṃ nissāya arahattaṃ pāpuṇi. Sāpi naṭadhītā "yā me sāmikassa gati, mayhaṃpi sā eva gatīti bhikkhunīnaṃ santike pabbajitvā arahatte patiṭṭhahīti.