"sabbadānanti imaṃ dhammadesanaṃ satthā jetavane viharanto sakkaṃ devarājaṃ ārabbha kathesi.

Ekasmiṃ hi samaye tāvatiṃsadevaloke devatā sannipatitvā cattāro pañhe samuṭṭhāpesuṃ "kataraṃ dānaṃ nu kho dānesu, kataro raso rasesu, katarā rati ratīsu jeṭṭhakā, taṇhakkhayova kasmā jeṭṭhakoti vuccatīti. Te pañhe ekā devatāpi vinicchituṃ nāsakkhi. Eko pana devo ekaṃ devaṃ pucchati, sopi aparanti Evaṃ aññamaññaṃ pucchantā dasasu cakkavāḷasahassesu dvādasa saṃvaccharāni vicariṃsu. Ettakenāpi kālena pañhānaṃ atthaṃ adisvā dasasahassacakkavāḷadevatā sannipatitvā catunnaṃ mahārājānaṃ santikaṃ gantvā, "kiṃ tātā mahādevasannipātoti vutte, "cattāro pañhe samuṭṭhāpetvā vinicchituṃ asakkontā tumhākaṃ santikaṃ āgatamhāti. "kiṃ pañhā nāma tātāti. "dānarasaratīsu kataradānarasarati nu kho seṭṭhā, taṇhakkhayova kasmā seṭṭhoti ime pañhe vinicchituṃ asakkontā āgatamhāti [tamatthaṃ ārocesuṃ]. "tātā mayaṃpi imesaṃ atthaṃ na jānāma; amhākaṃ pana rājā janasahassena cintite atthe cintetvā khaṇeneva jānāti, so amhehi paññāya ca puññena ca visiṭṭho, etassa santikaṃ gacchāmāti tameva devagaṇaṃ ādāya sakkassa devarañño santikaṃ gantvā, tenāpi "kiṃ tātā mahanto devasannipātoti vutte, tamatthaṃ ārocesuṃ. Sakko "tātā imesaṃ pañhānaṃ añño atthaṃ jānituṃ na sakkoti, buddhavisayā eteti vatvā "satthā panetarahi kahaṃ vasatīti pucchitvā "jetavaneti sutvā "etha tassa santikaṃ gamissāmāti devagaṇena saddhiṃ rattibhāge sakalaṃ jetavanaṃ obhāsetvā satthāraṃ upasaṅkamitvā vanditvā ekamantaṃ ṭhito, "kiṃ mahārāja mahatā devagaṇena saddhiṃ āgatosīti vutte, "bhante devagaṇena ime nāma pañhā samuṭṭhāpitā, añño imesaṃ atthaṃ jānituṃ samattho nāma natthi, imesaṃ no atthaṃ pakāsethāti āha. Satthā "sādhu mahārāja mayā tiṃsa pāramiyo pūretvā mahāpariccāge pariccajitvā tumhādisānaṃ kaṅkhāchedanatthameva sabbaññutaññāṇaṃ paṭividdhaṃ, tayā pucchitapañhe suṇāhi: sabbadānānaṃ dhammadānaṃ seṭṭhaṃ, sabbarasānaṃ dhammaraso seṭṭho, sabbaratīnaṃ dhammarati seṭṭhā, taṇhakkhayo pana arahattaṃ sampāpakattā seṭṭhoyevāti vatvā imaṃ gāthamāha