Udaggabhāvaṃ janeti assūni pavatteti lomahaṃsaṃ janeti, sā saṃsāravaṭṭassa antaṃ katvā arahattapariyosānā hoti; sabbaratīnaṃ evarūpā dhammaratiyeva seṭṭhā. Tena vuttaṃ "sabbaratiṃ dhammarati jinātīti.

Taṇhakkhayo pana taṇhāya khayante uppannaṃ arahattaṃ, taṃ sakalassāpi vaṭṭadukkhassa abhibhavanato sabbaseṭṭhameva. Tena vuttaṃ "taṇhakkhayo sabbadukkhaṃ jinātīti.

Evaṃ satthari imissā gāthāya atthaṃ kathenteyeva, caturāsītiyā pāṇasahassānaṃ dhammābhisamayo ahosi. Sakkopi satthu dhammakathaṃ sutvā satthāraṃ vanditvā āha "bhante evaṃ jeṭṭhake nāma dhammadāne kimatthaṃ amhākaṃ pattiṃ na dāpetha? ito paṭṭhāya no bhikkhusaṅghassa kathetvā pattiṃ dāpetha bhanteti. Satthā tassa vacanaṃ sutvā bhikkhusaṅghaṃ sannipātāpetvā "bhikkhave ajja ādiṃ katvā mahādhammassavanaṃ vā pakatidhammassavanaṃ vā upanisinnakathaṃ vā antamaso anumodanaṃpi kathetvā sabbasattānaṃ pattiṃ dadeyyāthāti āhāti.

Sakkadevarājavatthu.