Kāyena saṃvaroti ettha pana pasādakāyopi copanakāyopi labbhati. Ubhayaṃpi panetaṃ kāyadvārameva. Tattha pasādadvāre saṃvarāsaṃvaro kathito va. Copanadvārepi taṃvatthukā pāṇātipāta adinnādānamicchācāRā. Tehi pana saddhiṃ akusalavīthiyaṃ uppajjantehi tehi taṃ dvāraṃ asaṃvutaṃ hoti, kusalavīthiyaṃ uppajjantehi pāṇātipātāveramaṇīādīhi saṃvutaṃ.

Sādhu vācāyāti etthāpi copanavācā. Tāya saddhiṃ uppajjantehi musāvādādīhi taṃ dvāraṃ asaṃvutaṃ hoti, musāvādāveramaṇīādīhi saṃvutaṃ.

Manasā saṃvaroti etthāpi javanamanato aññena manena saddhiṃ abhijjhādayo natthi; manodvāre pana javanakkhaṇe uppajjamānehi Abhijjhādīhi taṃ dvāraṃ asaṃvutaṃ hoti, anabhijjhādīhi saṃvutaṃ.

Sādhu sabbatthāti: tesu cakkhudvārādīsu sabbesupi saṃvaro sādhu. Ettāvatā hi aṭṭha saṃvaradvārāni aṭṭha ca asaṃvaradvārāni kathitāni. Tesu aṭṭhasu asaṃvaradvāresu ṭhito bhikkhu sakalavaṭṭamūlakadukkhato na muccati, saṃvaradvāresu pana ṭhito sabbasmāpi vaṭṭamūlakadukkhā muccati; tena vuttaṃ "sabbattha saṃvuto bhikkhu sabbadukkhā pamuccatīti.