Sāvatthīvāsino kira dve sahāyakā bhikkhūsu pabbajitvā laddhūpasampadā yebhuyyena ekato vicaranti. Ekadivasaṃ aciravatiṃ gantvā nahātvā ātape tappamānā sārāṇīyaṃ kathaṃ kathentā aṭṭhaṃsu. Tasmiṃ khaṇe dve haṃsā ākāsena gacchanti. Atheko Daharabhikkhu sakkharaṃ gahetvā "ekassa haṃsapotakassa akkhiṃ paharissāmīti āha. Itaro "na sakkhissasīti āha. "tiṭṭhatu imasmiṃ passe akkhi, parapasse akkhiṃ paharisasāmīti. "idaṃpi na sakkhissasiyevāti. "tenahi upadhārehīti dutiyaṃ sakkharaṃ gahetvā haṃsassa pacchābhāge khipi. Haṃso sakkharasaddaṃ sutvā nivattitvā olokesi. Atha naṃ itaraṃ vaṭṭasakkharaṃ gahetvā parapasse akkhimhi paharitvā orimakkhinā nikkhāmesi. Haṃso viravanto parivattitvā tesaṃ pādamūleyeva pati. Tattha tattha ṭhitā bhikkhū disvā "āvuso buddhasāsane pabbajitvā ananucchavikaṃ vo kataṃ pāṇātipātaṃ karontehīti vatvā te ādāya gantvā tathāgatassa dassesuṃ. Satthā "saccaṃ kira tayā bhikkhu pāṇātipāto katoti pucchitvā, "saccaṃ bhanteti vutte, "bhikkhu kasmā evarūpe niyyānikasāsane pabbajitvā evamakāsi? porāṇakapaṇḍitā, anuppanne buddhe, agāramajjhe vasamānā appamattakesupi ṭhānesu kukkuccaṃ kariṃsu, tvaṃ pana evarūpe buddhasāsane pabbajitvā kukkuccamattampi na akāsīti vatvā tehi yācito atītaṃ āhari:
"atīte kururaṭṭhe indapattanagare dhanañjaye rajjaṃ kārente, bodhisatto tassa aggamahesiyā kucchimhi paṭisandhiṃ gahetvā anupubbena viññutaṃ patto takkasilāyaṃ sippāni uggahetvā pitarā uparajje patiṭṭhāpito aparabhāge pitu accayena rajjaṃ patvā dasa rājadhamme akopento kurudhamme pavattittha. Kurudhammo nāma Pañca sīlāni. Tāni bodhisatto parisuddhāni katvā rakkhati. Yathā bodhisatto, evamassa mātā aggamahesī kaniṭṭhabhātā uparājā purohito brāhmaṇo rajjuggāhako amacco sārathi seṭṭhī doṇamāpako mahāmatto dovāriko nagarasobhanā vaṇṇadāsīti evametesu ekādasasu janesu kurudhammaṃ rakkhantesu, kāliṅgaraṭṭhe dantapuranagare kāliṅge rajjaṃ kārente, tassa raṭṭhe devo na vassi; mahāsattassa pana añjanāsabho nāma maṅgalahatthī mahāpuñño hoti. Raṭṭhavāsino "tasmiṃ ānīte, devo vassissatīti saññāya ārocesuṃ. Rājā tassa hatthissa ānayanatthāya brāhmaṇe pahiṇi. Te gantvā mahāsattaṃ hatthiṃ yāciṃsu. Satthā imaṃ tesaṃ yācanākāraṃ dassetuṃ