Vatthu "athakho kokāliko bhikkhu, yena bhagavā, tenupasaṅkamīti sutte āgatameva. Atthopissa aṭṭhakathāyaṃ vuttanayeneva veditabbo. Kokālike pana padumaniraye uppanne, dhammasabhāyaṃ kathaṃ samuṭṭhāpesuṃ "aho kokāliko bhikkhu attano mukhaṃ nissāya vināsaṃ patto, dve aggasāvake akkosantasseva hissa paṭhavī vivaraṃ adāsīti. Satthā āgantvā "kāya nuttha bhikkhave etarahi kathāya sannisinnāti pucchitvā, "imāya nāmāti vutte, "na bhikkhave idāneva, pubbepi kokāliko attano mukhameva nissāya naṭṭhoti vatvā tamatthaṃ sotukāmehi bhikkhūhi yācito tassa pakāsanatthaṃ atītaṃ āhari:

"atīte himavantappadese ekasmiṃ sare kacchapo vasati. Dve haṃsapotakā gocarāya carantā tena saddhiṃ vissāsaṃ katvā daḷhavissāsikā hutvā ekadivasaṃ kacchapaṃ pucchiṃsu "samma amhākaṃ himavante cittakūṭapabbatatale kāñcanaguhāya vasanaṭṭhānaṃ ramaṇīyo padeso, gacchissasi amhehi saddhinti. "ahaṃ kathaṃ gamissāmīti. "mayaṃ taṃ nessāma, sace mukhaṃ rakkhituṃ sakkhissasīti. "sakkhissāmi,

Sammā gahetvā maṃ gacchathāti. Te "sādhūti vatvā ekaṃ daṇḍakaṃ kacchapena ḍaṃsāpetvā sayaṃ tassa ubho koṭiyo ḍaṃsitvā ākāsaṃ pakkhandiṃsu. Taṃ tathā haṃsehi nīyamānaṃ gāmadārakā disvā "dve haṃsā kacchapaṃ daṇḍena harantīti āhaṃsu. Kacchapo "yadi maṃ sahāyakā nenti, tumhākaṃ ettha kiṃ duṭṭhapetakāti vattukāmo, haṃsānaṃ sīghavegatāya bārāṇasīnagare rājanivesanassa uparibhāgaṃ sampattakāle ḍaṃsanaṭṭhānato daṇḍakaṃ vissajjetvā rājaṅgaṇe patitvā dvidhā bhijji. Satthā imaṃ atītaṃ āharitvā

"avadhī vata attānaṃ kacchapo vyāharaṃ giraṃ,