"dhammārāmo dhammaratoti imaṃ dhammadesanaṃ satthā jetavane viharanto dhammārāmattheraṃ ārabbha kathesi.

Satthārā kira "ito me cātummāsaccayena parinibbānaṃ bhavissatīti ārocite, anekasahassabhikkhū satthāraṃ parivāretvā vicariṃsu. Tattha puthujjanā assūni sandhāretuṃ nāsakkhiṃsu, khīṇāsavānaṃ dhammasaṃvego uppajji. Sabbepi "kiṃ nu kho karissāmāti vaggabandhanena vicaranti.

Eko pana dhammārāmo nāma bhikkhu bhikkhūnaṃ santikaṃ na upasaṅkamati, bhikkhūhi "kiṃ āvusoti vuccamāno paṭivacanaṃpi adatvā "satthā kira cātummāsaccayena parinibbāyissati, ahañcamhi avītarāgo, satthari dharamāneyeva, vāyamitvā arahattaṃ pāpuṇissāmīti ekakova viharanto satthārā desitaṃ dhammaṃ āvajjati cinteti anussarati. Bhikkhū tathāgatassa ārocesuṃ "bhante dhammārāmassa tumhesu sinehamattaṃpi natthi, `satthā kira parinibbāyissati, kiṃ nu kho karissāmāti amhehi saddhiṃ sammantanamattaṃpi na karotīti. Satthā taṃ pakkosāpetvā "saccaṃ kira tvaṃ evaṃ karosīti pucchi. "saccaṃ bhanteti. "kiṃkāraṇāti. "tumhe kira cātummāsaccayena parinibbāyissatha, ahañcamhi avītarāgo, tumhesu dharantesuyeva, vāyamitvā arahattaṃ pāpuṇissāmīti tumhehi desitaṃ dhammaṃ āvajjāmi cintemi anussarāmīti. Satthā "sādhu sādhūti tassa sādhukāraṃ datvā "bhikkhave aññenapi mayi sinehavantena bhikkhunā dhammārāmasadiseneva bhavitabbaṃ, na hi mayhaṃ mālāgandhādīhi pūjaṃ karontā pūjaṃ karonti nāma, dhammānudhammaṃ paṭipajjantāyeva maṃ pūjenti nāmāti vatvā imaṃ gāthamāha