5. Aññataravipakkhasevakabhikkhuvatthu. (256)

"salābhaṃ nātimaññeyyāti imaṃ dhammadesanaṃ satthā veḷuvane viharanto aññataraṃ vipakkhasevakaṃ bhikkhuṃ ārabbha kathesi.

Tassa kireko devadattapakkhiko bhikkhu sahāyo ahosi. So taṃ bhikkhūhi saddhiṃ piṇḍāya caritvā katabhattakiccaṃ āgacchantaṃ disvā "kuhiṃ gatosīti pucchi. "asukaṭṭhānaṃ nāma piṇḍāya caritunti. "laddho te piṇḍapātoti. "āma laddhoti. "idheva amhākaṃ mahālābhasakkāro, katipāhaṃ idheva hohīti. So tassa vacanena katipāhaṃ tattha vasitvā sakaṭṭhānameva agamāsi. Atha naṃ bhikkhū "ayaṃ Bhante devadattassa uppannaṃ lābhasakkāraṃ paribhuñjati, devadattassa pakkhiko esoti tathāgatassa ārocesuṃ. Satthā taṃ pakkosāpetvā "saccaṃ kira tvaṃ evamakāsīti pucchi. "āma bhante, ahaṃ tattha ekaṃ daharaṃ nissāya katipāhaṃ vasiṃ; na ca pana devadattassa laddhiṃ rocemīti.

Atha naṃ bhagavā "kiñcāpi laddhiṃ na rocesi, diṭṭhadiṭṭhānaṃyeva pana laddhiṃ rocento viya vicarasi; na tvaṃ idāneva evaṃ karosi, pubbepi evarūpoyevāti vatvā "idāni tāva bhante amhehi sāmaṃ diṭṭho, pubbe panesa kesaṃ laddhiṃ rocento vicari? ācikkhatha noti bhikkhūhi yācito, atītaṃ āharitvā