Satthā tassa ca brāhmaṇiyā cassa tiṇṇaṃ phalānaṃ upanissayaṃ disvā brāhmaṇassa bhojanavelāya gantvā dvāre aṭṭhāsi. Sopi dvārasammukhe antogehābhimukho nisīditvā bhuñjati, satthāraṃ dvāre ṭhitaṃ na passati. Brāhmaṇī panassa taṃ parivisamānā satthāraṃ disvā cintesi "ayaṃ brāhmaṇo pañcasu ṭhānesu aggaṃ datvā bhuñjati, idāni ca samaṇo gotamo āgantvā dvāre ṭhito; sace brāhmaṇo etaṃ disvā attano bhattaṃ haritvā dassati, punassāhaṃ pacituṃ na sakkhissāmīti. Sā "evamayaṃ samaṇaṃ gotamaṃ na passissatīti satthu piṭṭhiṃ datvā tassa pacchato taṃ paṭicchādentī onamitvā puṇṇacandaṃ pāṇinā paṭicchādentī viya aṭṭhāsi. Tathā ṭhitāeva "gato nu kho noti satthāraṃ aḍḍhakkhikena Olokesi. Satthā tattheva aṭṭhāsi. Brāhmaṇassa pana savanabhayena "aticchathāti na vadeti, osakkitvā pana saṇikameva "aticchathāti āha. Satthā "na gamissāmīti sīsaṃ cālesi. Lokagarunā buddhena "na gamissāmīti sīse cālite, sā sandhāretuṃ asakkontī mahāhasitaṃ hasi. Tasmiṃ khaṇe satthā gehābhimukhaṃ obhāsaṃ muñci. Brāhmaṇopi piṭṭhiṃ datvā nisinnoyeva brāhmaṇiyā hasitasaddaṃ sutvā chabbaṇṇānañca raṃsīnaṃ obhāsaṃ oloketvā satthāraṃ addasa. Buddhā hi nāma gāme vā araññe vā hetusampannānaṃ attānaṃ adassetvā na pakkamanti. Brāhmaṇopi satthāraṃ disvā "bhoti nāsitomhi tayā rājaputtaṃ āgantvā dvāre ṭhitaṃ mayhaṃ anācikkhantiyā, bhāriyante kammaṃ katanti vatvā aḍḍhabhuttabhojanapāṭiṃ ādāya satthu santikaṃ gantvā "bho gotama ahaṃ pañcasu ṭhānesu aggaṃ datvā bhuñjāmi; ito ca me majjhe bhinditvā ekova bhattakoṭṭhāso bhutto, eko bhattakoṭṭhāso avasiṭṭho; paṭiggaṇhātu me idaṃ bhattanti. Satthā "na me tava ucchiṭṭhabhattena atthoti avatvā "brāhmaṇa aggaṃpi mayhameva anucchavikaṃ, majjhe bhinditvā bhuttabhattaṃpi, carimakabhattapiṇḍopi mayhameva anucchaviko; mayaṃ hi brāhmaṇa paradattūpajīvino petasadisāti vatvā imaṃ gāthamāha