Brāhmaṇo taṃ sutvā va pasannacitto hutvā "aho acchariyaṃ; dīpasāmiko nāma rājaputto "na me tava ucchiṭṭhabhattena atthoti avatvā evaṃ vakkhatīti dvāre ṭhitakova satthāraṃ pañhaṃ pucchi "bho gotama tumhe attano sāvake `bhikkhūti vadatha: kittāvatā bhikkhu nāma hotīti. Satthā "kathaṃrūpā nu kho imassa dhammadesanā sappāyāti upadhārento "ime dvepi janā kassapabuddhakāle `nāmarūpanti vadantānaṃ kathaṃ suṇiṃsu, nāmarūpaṃ avissajjitvāva nesaṃ dhammaṃ desetuṃ vaṭṭatīti, "brāhmaṇa nāmarūpe arajjanto asajjanto bhikkhu nāma hotīti vatvā imaṃ gāthamāha

"sabbaso nāmarūpasmiṃ yassa natthi mamāyitaṃ,

asatā ca na socati, sa ve `bhikkhūti vuccatīti.

Tattha sabbasoti: sabbasmiṃ "vedanādīnaṃ catunnaṃ rūpakkhandhassa cāti pañcannaṃ khandhānaṃ vasena pavatte nāmarūpe.