Upajjhāyaṃ āpucchitvā tena dinnaṃ sāsanaṃ gahetvā anupubbena jetavanaṃ gantvā satthāraṃ vanditvā katappaṭisanthāro satthārā ekagandhakuṭiyaṃyeva anuññātasenāsano bahudeva rattiṃ ajjhokāse vītināmetvā rattibhāge gandhakuṭiṃ pavisitvā attano pattasenāsane taṃ rattibhāgaṃ vītināmetvā paccūsasamaye satthārā ajjhiṭṭho soḷasa aṭṭhakavaggikāni sabbāneva sarena abhaṇi. Athassa bhagavā sarabhaññapariyosāne abbhānumodanto "sādhu sādhu bhikkhūti sādhukāraṃ adāsi. Satthārā dinnaṃ sādhukāraṃ sutvā bhummaṭṭhakadevanāgasupaṇṇāti evaṃ yāva brahmalokā ekasādhukārameva ahosi. Tasmiṃ khaṇe jetavanato vīsayojanasatamatthake kuraragharanagare therassa mātu mahāupāsikāya gehe adhivatthā devatāpi mahantena saddena sādhukāraṃ adāsi. Atha naṃ mahāupāsikā āha "ko esa sādhukāraṃ detīti. "ahaṃ bhaginīti. "kosi tvanti. "tava gehe adhivatthā devatāti. "tvaṃ ito pubbe mayhaṃ sādhukāraṃ adatvā ajja kasmā desīti. "nāhaṃ tuyhaṃ sādhukāraṃ dammīti. "atha kassa te sādhukāro dinnoti. "tava puttassa kuṭikaṇṇasoṇattherassāti. "kiṃ me puttena katanti. "putto te ajja satthārā saddhiṃ ekagandhakuṭiyaṃ vasitvā satthu dhammaṃ desesi, satthā tava puttassa dhammaṃ sutvā pasanno sādhukāramadāsi, tenassa mayāpi sādhukāro dinno; sammāsambuddhassa hi sādhukāraṃ sampaṭicchitvā bhummaṭṭhakadeve ādiṃ katvā yāva brahmalokā ekasādhukārameva jātanti. "kiṃ pana sāmi mama puttena Satthu dhammo kathito, satthārā mama puttassa kathitoti. "tava puttena satthu kathitoti. Evaṃ devatāya kathentiyā, upāsikāya pañcavaṇṇā pīti uppajjitvā sakalasarīraṃ phari. Athassā etadahosi "sace me putto satthārā saddhiṃ ekagandhakuṭiyaṃ vasitvā satthu dhammaṃ kathetuṃ asakkhi, mayhaṃpi kathetuṃ sakkhissatiyeva; puttassa āgatakāle dhammassavanaṃ kāretvā dhammakathaṃ suṇissāmīti. Soṇattheropi kho, satthārā sādhukāre dinne, "ayaṃ upajjhāyena dinnaṃ sāsanaṃ ārocetuṃ kāloti bhagavantaṃ paccantimesu janapadesu vinayadharapañcamena gaṇena upasampadaṃ ādiṃ katvā pañca vare yācitvā katipāhaṃ satthu santikeyeva vasitvā "upajjhāyaṃ passissāmīti satthāraṃ āpucchitvā jetavanā nikkhamitvā anupubbena upajjhāyassa santikaṃ agamāsi. Thero punadivase taṃ ādāya piṇḍāya caranto mātu upāsikāya gehadvāraṃ agamāsi. Sāpi puttaṃ disvā tuṭṭhamānasā vanditvā sakkaccaṃ parivisitvā pucchi "saccaṃ kira tvaṃ tāta satthārā saddhiṃ ekagandhakuṭiyaṃ vasitvā satthu dhammakathaṃ kathesīti. "upāsike tuyhaṃ kenidaṃ kathitanti. "tāta imasmiṃ gehe adhivatthā devatā mahantena saddena sādhukāraṃ datvā, mayā `ko esoti vutte, "ahanti vatvā evameva kathesi; taṃ sutvā mayhaṃ etadahosi `sace me putto satthu dhammakathaṃ kathesi, mayhaṃpi kathetuṃ sakkhissatīti. Atha naṃ āha "tāta yato tayā satthu sammukhā