Dhammo kathito, mayhaṃpi kathetuṃ sakkhissasieva; asukadivase nāma dhammassavanaṃ kāretvā tava dhammaṃ suṇissāmīti. So adhivāsesi. Upāsikā "bhikkhusaṅghassa dānaṃ datvā pūjaṃ katvā puttassa me dhammakathaṃ suṇissāmīti ekameva dāsiṃ geharakkhikaṃ ṭhapetvā sabbaṃ parijanaṃ ādāya antonagare dhammassavanatthāya kārite maṇḍape alaṅkatadhammāsanaṃ abhiruyha dhammaṃ desentassa puttassa dhammakathaṃ sotuṃ agamāsi.
Tasmiṃ pana kāle navasatā corā tassā upāsikāya gehe otāraṃ olokentā vicaranti. Tassā pana gehaṃ sattahi pākārehi parikkhittaṃ sattadvārakoṭṭhakayuttaṃ tattha tattha tesu tesu ṭhānesu caṇḍe sunakhe bandhitvā ṭhapayiṃsu; antogehacchadanassa udakapātaṭṭhāne pana parikhaṃ khanitvā tipunā pūrayiṃsu, taṃ divā ātapena vilīnaṃ pakkuṭṭhitaṃ viya tiṭṭhati, rattiṃ thīnaṃ kakkhaḷaṃ hutvā tiṭṭhati; tassānantarā mahantāni ayasiṅghāṭakāni nirantaraṃ bhūmiyaṃ odahiṃsu. Iti imañca rakkhaṃ upāsikāya ca antogehe ṭhitabhāvaṃ paṭicca te corā okāsaṃ alabhantā taṃdivasaṃ tassāgatabhāvaṃ ñatvā ummaṅgaṃ bhinditvā tipuparikhāya ca ayasiṅghāṭakānañca heṭṭhābhāgeneva gehaṃ pavisitvā corajeṭṭhakaṃ tassā santikaṃ pahiṇiṃsu "sace sā amhākaṃ idha paviṭṭhabhāvaṃ sutvā nivattitvā gehābhimukhī āgacchati asinā naṃ paharitvā mārethāti. So gantvā tassā santike
Aṭṭhāsi. Corāpi antogehe dīpaṃ jāletvā kahāpaṇagabbhadvāraṃ vivariṃsu. Sā dāsī core disvā upāsikāya santikaṃ gantvā "ayye bahū corā gehaṃ pavisitvā kahāpaṇagabbhadvāraṃ vivariṃsūti ārocesi. "corā attanā diṭṭhakahāpaṇe harantu; ahaṃ mama puttassa dhammakathaṃ suṇāmi, mā me dhammassa antarāyaṃ kari, gehaṃ gacchāti. [1]- Corāpi kahāpaṇagabbhaṃ tucchaṃ katvā rajatagabbhaṃ vivariṃsu. Sā punapi āgantvā tamatthaṃ ārocesi. Upāsikā "corā attanā icchitaṃ harantu, mā me antarāyaṃ karīti puna taṃ pahiṇi. Corā rajatagabbhaṃpi tucchaṃ katvā suvaṇṇagabbhaṃ vivariṃsu. Sā punapi gantvā upāsikāya tamatthaṃ ārocesi. Atha naṃ upāsikā āmantetvā "[bhoti] je tvaṃ anekavāraṃ mama santikaṃ āgantvā `corā yathārucitaṃ harantu, ahaṃ mama puttassa dhammakathaṃ suṇāmi, mā me antarāyaṃ karīti mayā vuttāpi mama kathaṃ anādayitvā punappunaṃ āgacchasiyeva, sace idāni āgacchissasi, jānissāmi te kattabbaṃ, gehameva gacchāti pahiṇi. Corajeṭṭhako tassā kathaṃ sutvā "evarūpāya itthiyā santakaṃ harantānaṃ asani patitvā matthakaṃ bhindeyyāti corānaṃ santikaṃ gantvā "sīghaṃ upāsikāya santakaṃ paṭipākatikaṃ karothāti āha. Te kahāpaṇehi kahāpaṇagabbhaṃ rajatasuvaṇṇehi rajatasuvaṇṇagabbhe pūrayiṃsu. Dhammatā kiresā: yaṃ dhammo dhammacārinaṃ rakkhati; tenevāha