na duggatiṃ gacchati dhammacārīti.

Corā gantvā dhammassavanaṭṭhāne aṭṭhaṃsu. Theropi dhammaṃ kathetvā, vibhātāya rattiyā, āsanā otari. Tasmiṃ khaṇe corajeṭṭhako upāsikāya pādamūle nipajjitvā "khamāhi me ayyeti āha. "kiṃ idaṃ tātāti. "ahaṃ tumhesu āghātaṃ katvā tumhe māretukāmo aṭṭhāsinti. "tenahi tāta khamāmīti. Sesacorāpi tatheva katvā, "tātā khamāmīti vutte, āhaṃsu "ayye sace no khamatha, puttassa vo santike amhākaṃ pabbajjaṃ dāpethāti. Sā puttaṃ vanditvā āha "tāta ime corā mama guṇesu tumhākañca dhammakathāya pasannā pabbajjaṃ yācanti, pabbājetha neti. Thero "sādhūti vatvā tehi nivatthavatthānaṃ dasāni chindāpetvā tambamattikāya rajāpetvā te pabbājetvā sīlesu patiṭṭhāpesi. Upasampannakālepi nesaṃ ekekassa satassa visuṃ visuṃ kammaṭṭhānamadāsi. Te navasatā bhikkhū visuṃ visuṃ nava kammaṭṭhānāni gahetvā ekaṃ pabbataṃ abhiruyha tassa tassa rukkhassa chāyāya nisīditvā samaṇadhammaṃ kariṃsu.

Satthā vīsayojanasatamatthake jetavanamahāvihāre nisinnova te bhikkhū oloketvā tesaṃ cariyāvasena dhammadesanaṃ vavaṭṭhapetvā Obhāsaṃ pharitvā sammukhe nisīditvā kathento viya imā gāthā abhāsi.

"mettāvihāri yo bhikkhu pasanno buddhasāsane,