Tattha "mettāvihārīti: mettākammaṭṭhāne kammaṃ karontopi mettāvasena tikacatukkajjhānaṃ nibbattetvā ṭhitopi mettāvihārīyeva nāma.

Pasannoti: yo pana buddhasāsane pasanno hoti, pasādaṃ ropetiyevāti attho.

Padaṃ santanti: nibbānassetaṃ nāmaṃ. Evarūpo hi bhikkhu santikoṭṭhāsaṃ sabbasaṅkhārānaṃ upasantatāya saṅkhārūpasamaṃ paramasukhatāya "sukhanti laddhanāmaṃ nibbānaṃ adhigacchati, vindatiyevāti attho.

Siñca bhikkhu imaṃ nāvanti: bhikkhu imaṃ attabhāvasaṅkhātaṃ nāvaṃ micchāvitakkaudakaṃ siñcitvā chaḍḍento siñca.