Pītipāmojjanti: evaṃ khandhānaṃ udayabbayaṃ sammasanto dhammapītiṃ dhammapāmojjañca labhati.

Amatanti: taṃ, sappaccaye nāmarūpe pākaṭe hutvā upaṭṭhahante, uppannaṃ pītipāmojjaṃ amatamahānibbānasampāpakattā vijānataṃ Paṇḍitānaṃ amatamevāti attho.

Tatrāyamādi bhavatīti: tattha ayaṃ ādi idaṃ pubbaṭṭhānaṃ hoti.

Idha paññassāti: imasmiṃ sāsane paṇḍitabhikkhuno. Idāni taṃ "ādīti vuttaṃ pubbaṭṭhānaṃ dassento indriyaguttītiādimāha. Catupārisuddhisīlaṃ hi pubbaṭṭhānaṃ nāma. Tattha indriyaguttīti indriyasaṃvaro.