Santuṭṭhīti: catupaccayasantoso. Tena ājīvapārisuddhi ceva paccayasannissitañca sīlaṃ kathitaṃ.

Pāṭimokkheti: pāṭimokkhasaṅkhāte jeṭṭhakasīle pāripūrīkāritā kathitā.

Mitte bhajassu kalyāṇeti: vissaṭṭhakammante appaṭirūpasahāye vajjetvā sārajīvitatāya suddhājīve jaṅghabalaṃ nissāya jīvitakappanāya akusīte kalyāṇamitte bhajassu sevassūti attho.

Paṭisanthāravutyassāti: āmisapaṭisanthārena ca dhammapaṭisanthārena ca sampannavuttitāya paṭisanthāravutti assa, paṭisanthārakārako bhaveyyāti attho.