@2. Sī. Ma. Yu. santavā. 3. Sī. Ma. Yu. upasantoti.

10. Naṅgalakūṭattheravatthu 1-. (261)

"attanā codayattānanti imaṃ dhammadesanaṃ satthā jetavane viharanto naṅgalakūṭattheraṃ ārabbha kathesi.

Eko kira duggatamanusso paresaṃ bhatiṃ katvā jīvati. Taṃ eko bhikkhu pilotikakhaṇḍanivatthaṃ naṅgalaṃ ukkhipitvā gacchantaṃ disvā evamāha "kiṃ pana te evaṃ jīvanato pabbajituṃ na varanti. "ko maṃ bhante evaṃ jīvantaṃ pabbājessatīti. "sace pabbajissasi, ahantaṃ pabbājessāmīti. "sādhu bhante, sace maṃ pabbājessatha, pabbajissāmīti. Atha naṃ [so] thero jetavanaṃ netvā sahatthena nahāpetvā mālake ṭhapetvā pabbājetvā nivatthapilotikakhaṇḍena saddhiṃ naṅgalaṃ mālakasīmāyameva rukkhasākhāya ṭhapāpesi. So upasampadakālepi "naṅgalakūṭattherotveva paññāyi. So buddhānaṃ uppannalābhasakkāraṃ nissāya jīvanto ukkaṇṭhitvā vinodetuṃ asakkonto "nadāni saddhādeyyāni kāsāyāni paridahitvā gamissāmīti rukkhamūlaṃ gantvā attanāva attānaṃ ovadi "ahirika nillajja idaṃ nivāsetvā vibbhamitvā bhatiṃ katvā jīvitukāmo jātoti. Tassevaṃ attānaṃ ovadantasseva, cittaṃ tanubhāvaṃ gataṃ. So nivattitvā puna katipāhaccayena ukkaṇṭhitvā tatheva attānaṃ ovadi. Punassa cittaṃ nivattati. So imināva nīhārena ukkaṇṭhita- kāle tattha gantvā attānaṃ ovadi. Atha naṃ bhikkhū tattha