Oloketvā sarīrasampattidassanena atitto, "evaṃ ahaṃ niccakālaṃ tathāgataṃ daṭṭhuṃ labhissāmīti satthu santike pabbajitvā, yattha ṭhitena sakkā dasabalaṃ passituṃ, tattha ṭhito, sajjhāyakammaṭṭhāna- manasikārādīni pahāya satthāraṃ olokento vicarati. Satthā tassa ñāṇaparipākaṃ āgamento kiñci avatvā "idānissa ñāṇaṃ paripākaṃ gatanti ñatvā "kiṃ te vakkali iminā pūtikāyena diṭṭhena, yo kho vakkali dhammaṃ passati, so maṃ passati; yo maṃ passati, so dhammaṃ passatīti vatvā ovadi. So evaṃ ovaditopi satthu dassanaṃ pahāya neva aññattha gantuṃ sakkoti. Atha naṃ satthā "nāyaṃ bhikkhu saṃvegaṃ alabhitvā bujjhissatīti, upakkaṭṭhāya vassūpanāyikāya, rājagahaṃ gantvā vassūpanāyikādivase "apehi vakkalīti paṇāmeti. So "na maṃ satthā ālapatīti temāsaṃ satthu sammukhe ṭhātuṃ asakkonto "kiṃ mayhaṃ jīvitena, pabbatā attānaṃ pātessāmīti gijjhakūṭaṃ abhiruhi. Satthā tassa kilamanabhāvaṃ ñatvā "ayaṃ bhikkhu mama santikā assāsaṃ alabhanto, maggaphalānaṃ upanissayaṃ nāseyyāti attānaṃ dassetuṃ obhāsaṃ muñci. Athassa satthu diṭṭhakālato paṭṭhāya tāvamahantopi soko pahīyi.

Satthā sukkhataḷākaṃ oghena pūrento viya therassa balavappītipāmojjaṃ uppādetuṃ imaṃ gāthamāha

"pāmojjabahulo bhikkhu pasanno buddhasāsane

adhigacche padaṃ santaṃ saṅkhārūpasamaṃ sukhanti.