Ekadivasaṃ kira chasu khattiyesu pūve lakkhaṃ katvā gulehi kīḷantesu, anuruddho parājito, pūvānaṃ atthāya mātu santikaṃ pahiṇi. Sā mahantaṃ suvaṇṇathālaṃ pūretvā pūve pesesi. Pūve khāditvā puna kīḷanto parājito tatheva pahiṇi. Evaṃ tikkhattuṃ Pūvesu āhaṭesu, catutthe vāre mātā "idāni pūvā natthīti pahiṇi. Tassā vacanaṃ sutvā "natthīti padassa assutapubbatāya "natthipūvā nāma idāni bhavissantīti saññaṃ katvā "gaccha, natthipūve āharāti pesesi. Athassa mātā, "natthipūve kira ayye dethāti vutte, "mama puttena `natthīti padaṃ assutapubbaṃ, kathaṃ nu kho taṃ natthibhāvaṃ jānāpeyyanti, suvaṇṇapātiṃ dhovitvā aparāya suvaṇṇapātiyā paṭikujjitvā "handa tāta imaṃ mama puttassa dehīti pahiṇi. Tasmiṃ khaṇe nagarapariggāhakā devatā "amhākaṃ sāminā annabhārakāle upariṭṭhapaccekabuddhassa bhāgabhattaṃ datvā `natthīti padameva na suṇeyyanti patthanā ṭhapitā: sace mayaṃ tamatthaṃ ñatvā ajjhupekkheyyāma, muddhāpi no sattadhā phaleyyāti cintetvā dibbapūvehi pātiṃ pūrayiṃsu. So puriso pātiṃ āharitvā tesaṃ santike ṭhapetvā vivari. Tesaṃ gandho sakalanagaraṃ phari. Pūve pana mukhe ṭhapitamatte, sattarasaharaṇīsahassāni pharitvā aṭṭhāsi. Anuruddho cintesi "na maṃ maññe ito pubbe mātā piyāyati, na hi me aññadā tāya natthipūvā nāma pakkapubbāti. So gantvā mātaraṃ evamāha "amma nāhaṃ tava piyoti. "tāta kiṃ vadesi, mama akkhīhipi hadayamaṃsatopi tvaṃ piyataroti. "sacāhaṃ amma tava piyo, kasmā mama pubbe evarūpe natthipūve nāma na adāsīti. Sā taṃ purisaṃ pucchi "tāta kiñci pātiyaṃ ahosīti. "āma ayye, pūvānaṃ pāti paripuṇṇā ahosi, na me evarūpā Diṭṭhapubbāti. Sā cintesi "putto me katapuñño, devatāhissa dibbapūvā pahitā bhavissantīti. Sopi mātaraṃ āha "amma na mayā evarūpā pūvā khāditapubbā, ito paṭṭhāya me natthipūvameva paceyyāsīti. Sā tato paṭṭhāya tena "pūve khāditukāmomhīti vuttakāle suvaṇṇapātiṃ dhovitvā aññāya pātiyā paṭikujjitvā pahiṇati. Devatā pātiṃ pūrenti. Evaṃ so agāramajjhe vasanto "natthīti padassa atthaṃ ajānitvā dibbapūveyeva paribhuñji. Satthu pana parivāratthaṃ kulappaṭipāṭiyā sākiyakumāresu pabbajantesu, mahānāmena sakkena "tāta amhākaṃ kule koci pabbajito natthi, tayā vā pabbajitabbaṃ mayā vāti vutte, so āha "ahaṃ atisukhumālo pabbajituṃ na sakkhissāmīti. "tenahi kammantaṃ uggaṇha, ahaṃ pabbajissāmīti. "ko esa kammanto nāmāti. So hi bhattassa uṭṭhānaṭṭhānaṃpi na jānāti, kammantaṃ kimeva jānissati; tasmā evamāha.