Atha naṃ sāmaṇero "evaṃ mahārāja harāmīti vatvā "sakkonto harāhīti vutte, "tenahi suṭṭhu jānassūti tikkhattuṃ paṭiññaṃ gahetvā `buddhasāsanassa ānubhāvaṃ dassetvā mayā pānīyaṃ harituṃ vaṭṭatīti cintetvā ākāsaṭṭhakadevatānaṃ tāva santikaṃ agamāsi. Tā āgantvā vanditvā "kiṃ bhanteti vatvā aṭṭhaṃsu. "etasmiṃ anotattadahapiṭṭhe pannakanāgarājena saddhiṃ mama saṅgāmo bhavissati, tattha gantvā jayaparājayaṃ olokethāti āha. So eteneva nīhārena cattāro lokapāle sakkasuyāmasantusita sunimmita vasavattī ca upasaṅkamitvā tamatthaṃ ārocesi. Tato paraṃ paṭipāṭiyā yāva brahmalokā gantvā tattha tattha brahmehi āgantvā vanditvā ṭhitehi "kiṃ bhanteti puṭṭho, tamatthaṃ ārocesi. Evaṃ so asaññe ca arūpibrahmāno ca ṭhapetvā sabbattha muhuttameva āhiṇḍitvā ārocesi. Tassa vacanaṃ sutvā sabbāpi devatā anotattadahapiṭṭhe nāḷiyaṃ pakkhittā pūvacuṇṇā viya ākāsaṃ nirantaraṃ pūretvā sannipatiṃsu. Sannipatite devasaṅghe, sāmaṇero ākāse ṭhatvā nāgarājānaṃ āha

"suṇohi me nāgarāja uggateja mahabbala,

dehi me pānīyaghaṭaṃ, bhesajjatthamhi āgatoti.

Atha naṃ nāgo āha