Bhikkhū āhaṃsu "tenahi bhante thero bhikkhū uccinatū"ti. Thero sakalanavaṅgasatthusāsanapariyattidhare puthujjanasotāpannasakadāgāmianāgāmisukakhavipassaka- khīṇāsavabhikkhū anekasate anekasahasse ca vajjetvā tipiṭakasabbapariyattippabhedadhare paṭisambhidāppatte mahānubhāve yebhuyyena bhagavatā etadaggamāropite tevijjādibhede khīṇāsavabhikkhūyeva ekūnapañcasate pariggahesi. Ye sandhāya idaṃ vuttaṃ "athakho āyasmā mahākassapo ekenūnapañcaarahantasatāni uccinī"ti.

Kissa pana thero ekenūnamakāsīti. Āyasmato ānandattherassa okāsakaraṇatthaṃ. Tena hāyasmatā sahāpi vināpi dhammasaṅgīti na sakkā kātuṃ, so hāyasmā sekho sakaraṇīyo, tasmā saha na sakkā, yasmā panassa kiñci dasabaladesitaṃ suttageyyādikaṃ bhagavato asammukhāpaṭiggahitannāma natthi, tasmā vinā na sakkā. Yadi evaṃ sekhopi samāno dhammasaṅgītiyā bahūppakārattā therena uccinitabbo assa, atha kasmā na uccinitoti? parūpavādaparivajjanato. Thero

@3 vinaYu. cūḷa. 7/437/275 4 vinaYu. cūḷa. 7/437/275 Hi āyasmante ānande ativiya vissattho ahosi. Tathā hi naṃ sirasmiṃ palitesu jātesupi "navāyaṃ kumārako mattamaññāsī"ti kumārakavādeneva vadati sakyakulappasuto cāyamāyasmā ānando tathāgatassa bhātā cūḷapitu putto, tatra hitaṃ bhikkhū chandāgamanaṃ viya maññamānā "bahū asekhapaṭisambhidappatte bhikkhū ṭhapetvā ānandaṃ sekhapaṭisambhidappattaṃ thero uccinī"ti upavadeyyuṃ, taṃ parūpavādaṃ parivajjento "ānandaṃ vinā saṅgīti na sakkā kātuṃ, bhikkhūnaṃyeva anumatiyā gahessāmī"ti taṃ na uccini.