Ekadivasaṃ hi paṭhamayāmasamanantare sakko devarājā devaparisāya saddhiṃ āgantvā satthu santike sārāṇīyaṃ dhammakathaṃ suṇanto nisīdi. Tasmiṃ khaṇe khemā bhikkhunī "satthāraṃ passissāmīti āgantvā sakkaṃ disvā ākāse ṭhitāva satthāraṃ vanditvā nivatti. Sakko taṃ disvā "kā esā bhante āgacchamānā ākāse ṭhitāva vanditvā nivattīti pucchi. Satthā "esā mahārāja mama dhītā khemā nāma mahāpaññā maggāmaggassa kovidāti vatvā imaṃ gāthamāha

"gambhīrapaññaṃ medhāviṃ maggāmaggassa kovidaṃ

uttamatthaṃ anuppattaṃ tamahaṃ brūmi brāhmaṇanti.

Tattha "gambhīrapaññanti: gambhīresu khandhādīsu pavattāya paññāya samannāgataṃ dhammojappaññāya samannāgataṃ medhāviṃ "ayaṃ duggatiyā maggo, ayaṃ sugatiyā maggo, ayaṃ nibbānassa maggo, ayaṃ amaggoti evaṃ magge ca amagge ca chekatāya maggāmaggassa kovidaṃ arahattasaṅkhātaṃ uttamatthaṃ anuppattaṃ tamahaṃ brāhmaṇaṃ vadāmīti attho.