Devatāti. Thero "atthi nu kho mayā vejjakammassa kataṭṭhānanti upasampadakālato paṭṭhāya olokento attano sīle tilakaṃ vā kāḷakaṃ vā adisvā "ahaṃ mayā vejjakammassa kataṭṭhānaṃ na passāmi, kasmā evaṃ vadesīti āha. "na passasīti. "āma na passāmīti. "tenahi ācikkhāmi teti. "[āma] ācikkhāhīti. "tiṭṭhatu tāva dūre kathā, ajjeva tayā amanussaggahitassa upaṭṭhākaputtassa pādadhovanudakaṃ sīse āsittaṃ nāsittanti. "āma āsittanti. "kiṃ etaṃ na passasīti. "etaṃ sandhāya tvaṃ vadesīti. "āma etaṃ sandhāya vadāmīti. Thero cintesi "aho vata me sammāpaṇihito attā, sāsanassa anurūpaṃ vata me caritaṃ, devatāpi mama catupārisuddhisīle tilakaṃ vā kāḷakaṃ vā adisvā dārakassa sīse āsittaṃ pādadhovanamattaṃ addasāti. Tassa sīlaṃ ārabbha balavappīti uppajji. So taṃ vikkhambhetvā pāduddhāraṃpi akatvā tattheva arahattaṃ patvā "mādisaṃ parisuddhasamaṇaṃ dūsesi, mā idha vanasaṇḍe vasi, tvameva nikkhamāti devataṃ ovadanto imaṃ udānaṃ udānesi

"visuddho vata me vāso nimmalaṃ maṃ tapassinaṃ

mā tvaṃ visuddhaṃ dūsesi, nikkhama pavanā tuvanti.

So tattheva temāsaṃ vasitvā vutthavasso satthu santikaṃ gantvā bhikkhūhi "kiṃ āvuso pabbajitakiccante matthakaṃ pāpitanti puṭṭho, tasmiṃ lene vassupagamanato paṭṭhāya sabbantaṃ pavattiṃ bhikkhūnaṃ ārocetvā, "āvuso tvaṃ devatāya evaṃ vuccamāno na kujjhasīti Vutte, "na kujjhāmīti āha. Taṃ bhikkhū tathāgatassa ārocesuṃ "bhante ayaṃ bhikkhu aññaṃ byākaroti, devatāya imaṃ nāma vuccamānopi `na kujjhāmīti vadatīti. Satthā tesaṃ kathaṃ sutvā "neva bhikkhave mama putto kujjhati, etassa hi gihīhi vā pabbajitehi vā saṃsaggo nāma natthi, asaṃsaṭṭho esa appiccho santuṭṭhoti vatvā dhammaṃ desento imaṃ gāthamāha