22. Aññatarabhikkhuvatthu. (285)

"nidhāyāti imaṃ dhammadesanaṃ satthā jetavane viharanto aññataraṃ bhikkhuṃ ārabbha kathesi.

So kira satthu santike kammaṭṭhānaṃ gahetvā araññe vāyamanto arahattaṃ patvā "paṭiladdhaguṇaṃ satthu ārocessāmīti tato nikkhami. Atha naṃ ekasmiṃ gāme ekā itthī sāmikena saddhiṃ kalahaṃ katvā, tasmiṃ bahi nikkhamante, "kulagharaṃ gamissāmīti maggaṃ paṭipannā antarāmagge disvā "imaṃ theraṃ nissāya gamissāmīti piṭṭhito piṭṭhito anubandhi. Thero pana taṃ na passati. Athassā sāmiko gehaṃ āgato taṃ adisvā "kulagāmaṃ gatā bhavissatīti anubandhanto taṃ disvā "na sakkā imāya ekikāya imaṃ aṭaviṃ paṭipajjituṃ, kiṃ nu kho nissāya gacchatīti olokento theraṃ disvā "ayaṃ imaṃ gaṇhitvā nikkhanto bhavissatīti cintetvā theraṃ santajjesi. Atha naṃ sā itthī "neva maṃ esa bhadanto passati na ālapati, mā naṃ kiñci avacāti āha. So "kiṃ pana tvaṃ attānaṃ gahetvā gacchantaṃ mama na ācikkhissasi, tuyhameva anucchavikaṃ imassa karissāmīti uppannakodho itthiyā āghātena theraṃ pothetvā taṃ ādāya nivatti. Therassa sakalasarīraṃ sañjātagaṇḍaṃ ahosi. Athassa vihāraṃ āgatakāle bhikkhū sarīraṃ sambāhantā gaṇḍe disvā "kiṃ idanti pucchiṃsu. So tesaṃ tamatthaṃ ārocesi.

Atha naṃ bhikkhū "āvuso tasmiṃ purise evaṃ paharante, kiṃ tvaṃ avaca, kiṃ vā te kodho uppannoti. "na me āvuso kodho uppajjatīti. Te satthu santikaṃ gantvā tamatthaṃ ārocetvā "bhante eso bhikkhu `kodho te uppajjatīti vuccamāno `na me āvuso kodho uppajjatīti vadeti, abhūtaṃ vatvā aññaṃ byākarotīti. Satthā tesaṃ kathaṃ sutvā "bhikkhave khīṇāsavā nāma nihitadaṇḍā, te paharantesupi kodhaṃ na karontiyevāti vatvā imaṃ gāthamāha