So khandhepi hatthepi kacchāyapi gahetvā nikkaḍḍhiyamāno uṭṭhātuṃpi na icchati. Atha naṃ brāhmaṇī "ehi brāhmaṇa, tvaṃ ekasmiṃ hatthe gaṇha, ahaṃ ekasmiṃ gaṇhissāmīti. Ubhopi dvīsu hatthesu gahetvā piṭṭhiyaṃ pothentā gehadvārato bahi akaṃsu. Sakkopi nisinnaṭṭhāneyeva nisinno hatthaṃ parivattesi. Te nivattitvā taṃ nisinnameva disvā bhītaravaṃ ravantā vissajjesuṃ. Tasmiṃ khaṇe sakko attano sakkabhāvaṃ jānāpesi. Atha nesaṃ āhāraṃ adaṃsu. Pañcapi janā āhāraṃ gahetvā eko kaṇṇikamaṇḍalaṃ vinivijjhitvā eko chadanassa purimabhāgaṃ eko pacchimabhāgaṃ eko paṭhaviyaṃ nimujjitvā sakkopi ekena ṭhānena nikkhamīti evaṃ pañcapi janā pañca ṭhānāni agamaṃsu. Tato paṭṭhāya ca pana taṃ gehaṃ kira pañcachiddagehaṃ nāma jātaṃ sāmaṇerepi vihāraṃ gatakāle bhikkhū "āvuso kīdisanti pucchiṃsu. "mā no pucchatha, amhākaṃ diṭṭhakālato paṭṭhāya brāhmaṇī kodhābhibhūtā paññattāsanesu no nisīdituṃpi adatvā `sīghaṃ mahallakabrāhmaṇaṃ ānehīti āha, amhākaṃ upajjhāyo āgantvā amhe disvā `imesaṃ nisinnabrāhmaṇānaṃ laddhuṃ vaṭṭatīti pattaṃ āharāpetvā nikkhami, `aññaṃ mahallakabrāhmaṇaṃ ānehīti vutte, brāhmaṇo mahāmoggallānattheraṃ ānesi, so amhe disvā tatheva vatvā pakkāmi, atha brāhmaṇī `na ete bhuñjitukāmā, gaccha brāhmaṇavādakato ekaṃ mahallakabrāhmaṇaṃ ānehīti brāhmaṇaṃ pahiṇi, so tattha gantvā Brāhmaṇavesena āgataṃ sakkaṃ ānesi, tassāgatakāle amhākaṃ āhāraṃ adaṃsūti. "evaṃ karontānaṃ pana tesaṃ tumhe na kujjhitthāti. "na kujjhimhāti. Bhikkhū taṃ sutvā satthu ārocesuṃ "bhante ime `na kujjhimhāti abhūtaṃ vatvā aññaṃ byākarontīti. Satthā "bhikkhave khīṇāsavā nāma viruddhesupi na virujjhantiyevāti vatvā imaṃ gāthamāha

"aviruddhaṃ viruddhesu attadaṇḍesu nibbutaṃ

sādānesu anādānaṃ tamahaṃ brūmi brāhmaṇanti.

Tattha "aviruddhanti: āghātavasena viruddhesupi lokiyamahājanesu āghātābhāvena aviruddhaṃ hatthagate daṇḍe vā satthe vā avijjamānepi paresaṃ pahāradānato aviratattā attadaṇḍesu janesu nibbutaṃ nikkhittadaṇḍaṃ pañcannaṃ khandhānaṃ "ahaṃ mamanti gahitattā sādānesu tassa gahaṇassa abhāvena anādānaṃ taṃ evarūpaṃ ahaṃ brāhmaṇaṃ vadāmīti attho.