khaṇḍaphullapaṭisaṅkharaṇaṃ vaṇṇitaṃ, handa mayaṃ āvuso paṭhamamāsaṃ khaṇḍaphullapaṭisaṅkharaṇaṃ

karoma, majjhimamāsaṃ sannipatitvā dhammañca vinayañca saṅgāyissāmā"ti.

Te dutiyadivase gantvā rājadvāre aṭṭhaṃsu. Ajātasattu rājā āgantvā vanditvā "ahaṃ bhante kiṃ karomi, kenattho"ti pavāresi, therā aṭṭhārasamahāvihārapaṭisaṅkharaṇatthāya hatthakammaṃ paṭivedesuṃ. "sādhu bhante"ti rājā hatthakammakārake manusse adāsi. Therā paṭhamamāsaṃ sabbavihāre paṭisaṅkharāpesuṃ.

Atha rañño ārocesuṃ "niṭṭhitaṃ mahārāja vihārapaṭisaṅkharaṇaṃ, idāni dhammavinayasaṅgahaṃ karomā"ti. Sādhu bhante vissatthā karotha, mayhaṃ āṇācakkaṃ, tumhākaṃ dhammacakkaṃ hotu, āṇāpetha maṃ bhante kiṃ karomīti. "saṅgahaṃ karontānaṃ bhikkhūnaṃ sannisajjaṭṭhānaṃ mahārājāti. Kattha karomi bhanteti. Vebhārapabbatapasse sattapaṇṇaguhādvāre kātuṃ yuttaṃ mahārājāti. "sādhu bhante"ti. Kho rājā ajātasattu vissukammunā nimmitasadisaṃ suvibhattabhittithambhasopānaṃ nānāvidhamālākammalatākamma- vicittaṃ mahāmaṇḍapaṃ kārāpetvā vividhakusumadāmaolambakaviniggalantacāruvitānaṃ ratanavicittamaṇikoṭṭimatalamiva ca naṃ nānāpupphūpahāravicittaṃsupariniṭṭhitabhūmikammaṃ brahmavimānasadisaṃ alaṅkaritvā tasmiṃ mahāmaṇḍape pañcasatānaṃ bhikkhūnaṃ anagghāni pañcakappiyapaccattharaṇasatāni paññāpetvā dakkhiṇabhāgaṃ nissāya uttarābhimukhaṃ therāsanaṃ paññāpetvā maṇḍapamajjhe puratthābhimukhaṃ buddhassa bhagavato āsanārahaṃ dhammāsanaṃ paññāpetvā dantakhacitañcettha vījaniṃ ṭhapetvā bhikkhusaṃghassa ārocāpesi "niṭṭhitaṃ bhante mama kiccan"ti.