Jotiko āgantvā rājānaṃ paccuggantvā vanditvā pacchato hutvā "purato yātha devāti āha. Rañño maṇipaṭhavī sataporisappapāto viya hutvā upaṭṭhāti. So "iminā mama gahaṇatthāya opāto khanitoti maññamāno pādaṃ nikkhipituṃ na visahi. Jotiko "nāyaṃ deva opāto, mama pacchato āgacchathāti purato ahosi. Rājā tena akkantakāle bhūmiṃ akkamitvā heṭṭhimatalato paṭṭhāya pāsādaṃ olokento vicari. Tadā ajātasattu kumāro pitu aṅguliṃ gahetvā vicaranto cintesi "aho andhabālo mama pitā, gahapatike nāma sattaratanamaye pāsāde vasante, esa rājā hutvā dārumaye gehe vasati, ahandāni rājā hutvā imassa imasmiṃ pāsāde vasituṃ na dassāmīti. Rañño uparimatalāni abhiruhantasseva, pātarāsavelā jātā. So seṭṭhiṃ āmantetvā "mahāseṭṭhi idheva pātarāsaṃ bhuñjissāmāti. "jānāmi deva, sajjito devassāhāroti. So soḷasahi gandhodakaghaṭehi nahātvā ratanamaye seṭṭhissa nisīdanamaṇḍape paññatte tasseva nisīdanapallaṅke nisīdi. Athassa hatthadhovanudakaṃ datvā satasahassagghanikāya suvaṇṇapātiyā kilinnapāyāsaṃ vaḍḍhetvā purato ṭhapayiṃsu. Rājā "bhojananti saññāya bhuñjituṃ ārabhi. Seṭṭhī "nayidaṃ deva bhojanaṃ, kilinnapāyāso esoti. Aññissā suvaṇṇapātiyā bhojanaṃ vaḍḍhetvā purimapātiyaṃ ṭhapayiṃsu. Tato uṭṭhitautunā kira taṃ bhuñjituṃ sukhaṃ hoti. Rājā madhurabhojanaṃ

Bhuñjanto pamāṇaṃ na aññāsi. Atha naṃ seṭṭhī vanditvā añjaliṃ paggayha "alaṃ deva, ettakameva hotu, ito uttariṃ jīrāpetuṃ na sakkāti āha. Atha naṃ rājā āha "kiṃ gahapati garukaṃ katvā kathesi attano bhattanti. "deva natthetaṃ, tumhākaṃ sabbassāpi hi balakāyassa idameva bhattaṃ, idaṃ sūpeyyaṃ, apica kho ahaṃ ayasassa bhāyāmīti. "kiṃkāraṇāti. "sace devassa kāyālasiyamattaṃ bhaveyya, `hiyyo raññā seṭṭhissa gehe bhuttaṃ, seṭṭhinā kiñci kataṃ bhavissatīti vacanassa bhāyāmi devāti. "tenahi bhattaṃ hara, udakaṃ āharāti. Rañño bhattakiccāvasāne sabbo rājaparivāro tadeva bhattaṃ bhuñji. Rājā sukhakathāya nisinno seṭṭhiṃ āmantetvā "kiṃ imasmiṃ gehe tava bhariyā natthīti āha. "atthi devāti. "kahaṃ sāti. "sirigabbhe nisinnā devassa āgatabhāvaṃ na jānātīti āha. Kiñcāpi hi pātova rājā saparivāro āgato, sā pana tassa āgatabhāvaṃ na jānāti. Tato seṭṭhī "rājā me bhariyaṃ daṭṭhukāmoti tassā santikaṃ gantvā "rājā āgato, kiṃ tava rājānaṃ daṭṭhuṃ na vaṭṭatīti āha. Sā nipannakā va "ko so sāmi rājā nāmāti vatvā, "rājā nāma amhākaṃ issaroti vutte, anattamanataṃ pavedentī "dukkaṭāni vata no puññakammāni, yesanno issaropi atthi, assaddhāya nāma puññakammāni katvā mayaṃ sampattiṃ pāpuṇitvā aññassa issariyaṭṭhāne nibbattamhā;