Kassapasammāsambuddhassa hi cetiye kariyamāne, eko khīṇāsavo cetiyaṭṭhānaṃ gantvā oloketvā "tātā kasmā cetiyassa uttarena mukhaṃ na uṭṭhahatīti pucchi. "suvaṇṇaṃ nappahotīti. "ahaṃ antogāmaṃ pavisitvā samādapessāmi, tumhe ādarena kammaṃ karothāti. So evaṃ vatvā nagaraṃ pavisitvā "ammatātā amhākaṃ cetiyassa ekasmiṃ mukhe suvaṇṇaṃ nappahoti, suvaṇṇaṃ jānāthāti mahājanaṃ samādapento suvaṇṇakārakulaṃ agamāsi. Suvaṇṇakāropi taṃkhaṇaṃyeva bhariyāya saddhiṃ kalahaṃ karonto nisinno hoti. Atha naṃ thero "cetiye tumhehi gahitamukhassa suvaṇṇaṃ nappahoti, taṃ jānituṃ vaṭṭatīti āha. So bhariyāya kopena "tava satthāraṃ udake khipitvā gacchāti āha. Atha naṃ sā "atisāhasikaṃ kammaṃ te kataṃ, mama kuddhena te ahameva

Akkositabbā vā paharitabbā vā, kasmā atītānāgatappaccuppannesu buddhesu veramakāsīti āha. Suvaṇṇakāro tāvadeva saṃvegappatto hutvā "khamatha me bhanteti vatvā therassa pādamūle nipajji. "tāta ahaṃ tayā na kiñci vutto, satthāraṃ khamāpehīti. "kinti katvā khamāpemi bhanteti. "suvaṇṇapupphānaṃ tayo kumbhe katvā antodhātunidhāne pakkhipitvā allavattho allakeso hutvā khamāpehi tātāti. So "sādhu bhanteti suvaṇṇapupphāni karonto tīsu puttesu jeṭṭhaputtaṃ pakkosāpetvā "ehi tāta, ahaṃ satthāraṃ veravacanena avacaṃ; tasmā imāni pupphāni katvā dhātunidhāne pakkhipitvā khamāpessāmi, tvaṃpi kho me sahāyo hohīti āha. So "na tvaṃ mayā veravacanaṃ vadāpito, tvaṃyeva karohīti kātuṃ na icchi. Majjhimaputtaṃ pakkosāpetvā tathevāha. Sopi tatheva vatvā na icchi. Kaniṭṭhaṃ pakkosāpetvā āha. So "pitu uppannakiccaṃ nāma puttassa bhāroti pitu sahāyo hutvā pupphāni akāsi. Suvaṇṇakāro vidatthippamāṇānaṃ pupphānaṃ tayo kumbhe niṭṭhāpetvā dhātunidhāne pakkhipitvā allavattho allakeso satthāraṃ khamāpesi. Iti so sattakkhattuṃ jātakāle udake pātanaṃ labhi. Ayaṃ panassa koṭiyaṃ ṭhito attabhāvo, idānipi tasseva nissandena udake pātito. Ye panassa dve puttā suvaṇṇapupphānaṃ karaṇakāle sahāyā bhavituṃ na icchiṃsu, tesaṃ tena Kāraṇena suvaṇṇapabbato na nibbatti; kaniṭṭhaputtassa ca ekato katabhāvena nibbatti.