Ajātasattukumāropi devadattena saddhiṃ ekato hutvā pitaraṃ ghātetvā rajje patiṭṭhito "jotikassa pāsādaṃ gaṇhissāmīti yuddhasajjo nikkhamitvā maṇipākāre saparivārassa attano chāyaṃ disvāva "gahapatiko yuddhasajjo hutvā balaṃ ādāya nikkhantoti sallakkhetvā upagantuṃ na visahi. Seṭṭhipi taṃdivasaṃ uposathiko hutvā pātova bhuttapātarāso vihāraṃ gantvā satthu santike dhammaṃ suṇanto nisinno hoti. Paṭhamadvārakoṭṭhake rakkhaṃ gahetvā ṭhito pana yamamoli yakkho taṃ disvā "kahaṃ gacchasīti saparivāraṃ viddhaṃsetvā disāvidisāsu anubandhi. Rājā vihārameva agamāsi. Atha naṃ seṭṭhī disvāva "kiṃ devāti vatvā uṭṭhāyāsanā aṭṭhāsi. "gahapati kiṃ tvaṃ tava purise `mayā saddhiṃ yujjhathāti āṇāpetvā idhāgamma dhammaṃ suṇanto viya nisinnoti. "kiṃ pana devo mama gehaṃ gaṇhituṃ gatoti. "āma gatomhīti. "mama anicchāya mama gehaṃ gaṇhituṃ rājasahassaṃpi na sakkoti devāti. So "kiṃ pana tvaṃ rājā bhavissasīti kujjhi. "nāhaṃ rājā, mama santakaṃ pana dasikasuttaṃpi mama anicchāya rājūhi vā corehi vā gahetuṃ na sakkāti. "kiṃ panāhaṃ tava ruciyā gaṇhissāmīti. "tenahi deva imā me dasasu aṅgulīsu vīsati muddikā, imāhaṃ tumhākaṃ na demi; sace sakkotha, gaṇhathāti. So pana rājā bhūmiyaṃ ukkuṭikaṃ nisīditvā ullaṅghanto aṭṭhārasahatthaṃ ṭhānaṃ abhiruhati, ṭhatvā
Ullaṅghanto asītihatthaṃ ṭhānaṃ abhiruhati. Evaṃ mahābalo samānopi ito cito ca parivattento ekaṃ muddikaṃpi kaḍḍhituṃ nāsakkhi. Atha naṃ seṭṭhī "sāṭakaṃ patthara devāti vatvā aṅguliyo ujukaṃ akāsi. Vīsatipi muddikā nikkhamiṃsu. Atha naṃ seṭṭhī "evaṃ deva mama santakaṃ mama anicchāya na sakkā gaṇhitunti vatvā rañño kiriyāya uppannasaṃvego "pabbajituṃ me anujānātha devāti āha. So "imasmiṃ pabbajite, sukhaṃ pāsādaṃ gaṇhissāmīti cintetvā, ekavacaneneva "pabbajāhīti āha. So satthu santike pabbajitvā na cirasseva arahattaṃ patvā jotikatthero nāma ahosi. Tassa arahattappattakkhaṇeyeva sabbāpi sā sampatti antaradhāyi. Taṃpissa satulakāyaṃ nāma bhariyaṃ devā uttarakurumeva nayiṃsu. Athekadivasaṃ bhikkhū taṃ āmantetvā "āvuso jotika tasmiṃ pana te pāsāde vā itthiyā vā taṇhā atthīti pucchitvā "natthāvusoti vutte, satthu ārocesuṃ "ayaṃ bhante abhūtaṃ vatvā aññaṃ byākarotīti. Satthā "nattheva bhikkhave mama puttassa tasmiṃ taṇhāti vatvā imaṃ gāthamāha