@3 cha.Ma. dhammasaṅgahaṃ 4 cha.Ma., i. vissakammunā

Bhikkhū āyasmantaṃ ānandamāhaṃsu "sve āvuso sannipāto, tvañca sekho sakaraṇīyo, tena te na yuttaṃ sannipātaṃ gantuṃ, appamatto hohī"ti. Athakho āyasmā ānando "sveva sannipāto, na kho pana me taṃ paṭirūpaṃ, yvāhaṃ sekho samāno sannipātaṃ gacchayyan"ti bahudeva rattiṃ kāyagatāsatiyā vītināmetvā rattiyā paccūsasamaye caṅkamā orohitvā vihāraṃ pavisitvā "nipajjissāmī"ti kāyaṃ āvaṭṭesi. Dve pādā bhūmito muttā, asampattañca sīsaṃ bimbohanaṃ, etasmiṃ antare anupādāya āsavehi cittaṃ vimucci. Ayañhi āyasmā caṅkamena bahi vītināmetvā visesaṃ nibbattetuṃ asakkonto cintesi "nanu maṃ bhagavā etadavoca `katapuññosi tvaṃ ānanda padhānamanuyuñja, khippaṃ hohisi anāsavo'ti buddhānañca kathādoso nāma natthi, mama pana accāraddhaṃ viriyaṃ, tena me cittaṃ uddhaccāya saṃvattati, handāhaṃ viriyasamattaṃ yojemī"ti caṅkamā orohitvā pādadhovanaṭṭhāne ṭhatvā pāde dhovitvā vihāraṃ pavisitvā mañcake nisīditvā "thokaṃ vissamissāmī"ti kāyaṃ mañcake upanāmesi. Dve pādā bhūmito muttā, sīsaṃ ca bimbohanaṃ asampattaṃ etasmiṃ antare anupādāya āsavehi cittaṃ vimuttaṃ. Catuiriyāpathavirahitaṃ therassa arahattaṃ. Tena "imasmiṃ sāsane anippanno anisinno aṭṭhito acaṅkamanto ko bhikkhu arahattaṃ patto"ti vutte "ānandatthero"ti vattuṃ vaṭṭati.

Atha therā bhikkhū dutiyadivase bhattakacicaṃ katvā pattacīvaraṃ paṭisāmetvā dhammasabhāyaṃ sannipatitā. Ānandatthero pana attano arahattappattiṃ ñāpetukāmo bhikkhūhi saha na gato. Bhikkhū yathāvuḍḍhaṃ attano attano āsane nisīdantā ānandattherassa āsanaṃ ṭhapetvā nisinnā. Tattha kehici "etamāsanaṃ kassā"ti vutte ānandassāti. Ānando pana kuhiṃ gatoti. Tasmiṃ samaye thero cintesi "idāni mayhaṃ gamanakālo"ti. Tato attano ānubhāvaṃ dassento paṭhaviyaṃ nimmujjitvā attano āsaneyeva attānaṃ dassesi. Ākāsena gantvā nisīdīti eke.