yathābalaṃ karissāmi udānassatthavaṇṇanaṃ.

Iti ākaṅkhamānassa saddhammassa ciraṭṭhitiṃ

vibhajantassa tassatthaṃ sādhu gaṇhantu sādhavoti.

Tattha udānanti kenaṭaṭhena udānaṃ? udānaṭṭhena. Kimidaṃ udānaṃ nāma? Pītivegasamuṭṭhāpito udāhāro. Yathā hi yaṃ telādi minitabbavatthu pamāṇaṃ gahetuṃ na sakkoti, vissanditvā gacchati. Taṃ "avaseko"ti vuccati. Yañca jalaṃ taḷākaṃ gahetuṃ na sakkoti, ajjhottharitvā gacchati, taṃ "ogho"ti vuccati. Evameva yaṃ pītivegasamuṭṭhāpitaṃ vitakkavipphāraṃ antohadayaṃ sandhāretuṃ na sakkoti, so adhiko hutvā anto asaṇṭhahitvā bahi vacīdvārena nikkhanto paṭiggāhakanirapekkho udāhāraviseso "udānan"ti vuccati. Dhammasaṃvegavasenapi ayamākāro labbhateva.