Tayidaṃ katthaci gāthābandhavasena katthaci vākyavasena pavattaṃ. Yampana aṭṭhakathāsu "somanassañāṇamayikagāthāpaṭisaṃyuttā"ti udānalakkhaṇaṃ vuttaṃ, taṃ yebhuyyavasena vuttaṃ. Yebhuyyena hi udānaṃ gāthābandhavasena bhāsitaṃ pītisomanassa- samuṭṭhāpitañca. Itarampi pana "atthi bhikkhave tadāyatanaṃ, yattha neva paṭhavī na āpo"tiādīsu "sukhakāmāni bhūtāni, yo daṇḍena vihiṃsatī"ti "sace bhāyatha dukkhassa, sace vo dukkhamappiyan"ti evamādīsu ca labbhati.

Evaṃ tayidaṃ sabbaññubuddhabhāsitaṃ paccekabuddhabhāsitaṃ sāvakabhāsitanti tividhaṃ hoti. Tattha paccekabuddhabhāsitaṃ "sabbesu bhūtesu nidhāya daṇḍaṃ, aviheṭhayaṃ aññatarampi tesan"tiādinā khaggavisāṇasutte āgatameva. Sāvakabhāsitānipi:-

"sabbo rāgo pahīno me sabbo doso samūhato