"evamevaṃ panāyan"ti ettha garahaṇākāroti vuttanayena yojetabbaṃ. So ca garahaṇākāro "vasalī"tiādikhuṃsanasaddasannidhānato idha evaṃsaddena pakāsitoti viññāyati. Yathā cettha, evaṃ upamā kārādayopi upamādivasena vuttānaṃ puppharāsiādisaddānaṃ sannidhānato vuttāti veditabbaṃ.

"evañca vadehī"ti yathāhaṃ vadāmi, evaṃ samaṇamānandaṃ vadehīti vadanākāro idāni vattabbo evaṃsaddena nidassiyatīti "nidassanattho"ti vuttaṃ.

"evaṃ no"ti etthāpi tesaṃ yathāvuttadhammānaṃ ahitadukakhāvahabhāvena sanniṭṭhānajananatthaṃ anumatiggahaṇavasena "no vā kathaṃ vo ettha hotī"ti pucchāya katāya "evaṃ no ettha hotī"ti vuttattā tadākārasanniṭṭhānaṃ evaṃsaddena āvikataṃ. So pana tesaṃ dhammānaṃ ahitāya dukkhāya saṃvattanākāro niyamiyamāno avadhāraṇattho hotīti vuttaṃ "evaṃ no ettha hotītiādīsu avadhāraṇe"ti.

Evamākāravisesavācīnampi etesaṃ evaṃsaddānaṃ upamādivisesatthavuttitāya upamādiatthatā vuttā, "evambhante"ti pana dhammassa sādhukaṃ savanamanasikāre