Athakho āyasmā ānando saṃghaṃ ñāpesi:-

"suṇātu me bhante saṃgho, yadi saṃghassa pattakallaṃ,

ahaṃ āyasmatā mahākassapena dhammaṃ puṭṭho vissajjeyyana"ti.

Athakho āyasmā ānando uṭṭhāyāsanā ekaṃsaṃ cīvaraṃ katvā there bhikkhū vanditvā dhammāsane nisīdi dantakhacitaṃ bījaniṃ gahetvā. Mahākassapatthero ānandattheraṃ dhammaṃ pucchi. Pucchāvidhānañca sutteyeva vuttaṃ. Yathāha athakho āyasmā mahākassapo āyasmantaṃ ānandaṃ etadavoca "brahmajālaṃ āvuso ānanda kattha bhāsitan"ti. Antarā ca bhante rājagahaṃ antarā ca nālandaṃ rājāgārake ambalaṭṭhikāyanti. Kaṃ ārabbhāti. Suppiyañca paribbājakaṃ brahmadattañca māṇavanti. Athakho āyasmā mahākassapo āyasmantaṃ ānandaṃ brahmajālassa nidānampi pucchi, puggalampi pucchi. Sāmaññaphalampanāvuso ānanda kattha bhāsitanti. Rājagahe bhante jīvakambavaneti. Kena saddhinti. Ajātasattunā vedehīputtena saddhinti. Athakho āyasmā mahākassapo āyasmantaṃ ānandaṃ sāmaññaphalassa nidānampi pucchi, puggalampi pucchīti. Etenevupāyena pañca nikāye pucchi, puṭṭho puṭṭho āyasmā ānando visajjesīti. Ayaṃ paṭhamamahāsaṅgīti pañcahi arahantasatehi therehi katā:- yā loke