samavāye khaṇe kāle samūhe hetudiṭṭhisu

paṭilābhe pahāne ca paṭivedhe ca dissati.

Tathā hissa "appevanāma svepi upasaṅkameyyāma kālañca samayañca upādāyā"ti evamādīsu samavāyo attho, yuttakālañca paccayasāmaggiñca labhitvāti hi adhippāyo, tasmā paccayasamavāyoti veditabbo. "ekova kho bhikkhave khaṇo ca samayo ca brahmacariyavāsāyā"tiādīsu khaṇo, okāsoti attho. Tathāgatuppādādiko hi maggabrahmacariyassa okāso tappaccayappaṭilābhahetuttā, khaṇo eva ca samayo, yo khaṇoti ca samayoti ca vuccati, so ekoyevāti hi attho.