@4 cha.Ma. therasatehi 5 cha.Ma. yā loketi na dissati 6 cha.Ma., i. sutaṃ Yassa ca bhāsitaṃ, taṃ sabbaṃ kathetukāmena "evaṃ bhāsitaṃ mayā sutaṃ, ekaṃ samayaṃ bhāsitaṃ, bhagavatā bhāsitaṃ, sāvatthiyaṃ bhāsitaṃ, devatāya bhāsitan"ti etamatthaṃ dassentena āyasmatā ānandena vuttaṃ "evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme athakho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ aṭṭhāsi ekamantaṃ ṭhitā kho sā devatā bhagavantaṃ gāthāya ajjhabhāsī"ti. Evamidaṃ āyasmatā ānandena vuttaṃ, tañca pana paṭhamamahāsaṅgītikāle vuttanti veditabbaṃ.

Idāni "kasmā vuttan"ti ettha vuccate:- yasmā ayamāyasmā mahākassapattherena nidānaṃ puṭṭho, tasmā nena taṃ nidānaṃ ādito pabhūti vitthāretuṃ vuttaṃ. Yasmā vā āyasmantaṃ ānandaṃ dhammāsane nisinnaṃ vasīguṇaparivutaṃ disvā ekaccānaṃ devatānaṃ cittamuppannaṃ "ayamāyasmā vedehimuni pakatiyāpi sakyakulanvayo bhagavato dāyādo, bhagavatāpi pañcakkhattuṃ etadagge niddiṭṭho, catūhi acchariyabbhūtadhammehi samannāgato, catunnaṃ parisānaṃ piyo manāpo, idāni maññe bhagavato dhammarajje dāyajjaṃ patvā buddho jāto"ti. Tasmā āyasmā ānando tāsaṃ devatānaṃ cetasā cetoparivitakkamaññāya taṃ abbhūtasambhāvanaṃ anadhivāsento attano sāvakabhāvameva dīpetuṃ āha "evamme sutaṃ ekaṃ samayaṃ bhagavā .pe. Ajjhabhāsī"ti. Etthantare pañca arahantasatāni anekāni ca devatāsatasahassāni "sādhu sādhū"ti āyasmantaṃ ānandaṃ abhinandiṃsu. Mahābhūmicālo ahosi, nānāvidhakusumavassaṃ antalikkhato patati, aññāni ca bahūni acchariyāni pāturahesuṃ, bahunnañca devatānaṃ saṃvego uppajji "yaṃ amhehi bhagavato sammukhā sutaṃ, taṃ idāneva parokkhaṃ jātan"ti. Evamidaṃ āyasmatā ānandena paṭhamamahāsaṅgīti- kāle vadantenāpi iminā kāraṇena vuttanti veditabbaṃ. Ettāvatā ca "vuttaṃ yena yadā yasmā, cetaṃ vatvā imaṃ vidhin"ti imissā aḍḍhagāthāya attho pakāsito hoti.