Athāti adhikāratthe nipāto. Khoti padapūraṇe. Tesu adhikāratthena athāti iminā vimuttisukhapaṭisaṃvedanato aññaṃ adhikāraṃ dasseti. Ko panesoti? paṭicca- samuppādamanasikāro. Athāti vā pacchāti etasmiṃ atthe nipāto, tena "tassa sattāhassa accayenā"ti vakkhamānameva atthaṃ joteti. Tassa sattāhassāti pallaṅkasattāhassa. accayenāti apagamena. Tamhā samādhimhāti arahattaphalasamādhito. Idha pana ṭhatvā paṭipāṭiyā satta sattāhāni dassetabbānīti keci tāni vitthārayiṃsu. Mayaṃ pana tāni khandhakapāṭhena imissā udānapāḷiyā avirodhadassanamukhena parato vaṇṇayissāma. Rattiyāti avayavasambandhe sāmivacanaṃ. Paṭhamanti accantasaṃyogatthe upayogavacanaṃ. Bhagavā hi tassā rattiyā sakalampi paṭhamaṃ yāmaṃ teneva manasikārena yutto ahosīti.

Paṭiccasamuppādanti paccayadhammaṃ. Avijjādayo hi paccayadhammā paṭiccasamuppādo. Kathamidaṃ jānitabbanti ce? bhagavato vacanena. Bhagavatā hi "tasmā tihānanda eseva

@3 vi.mahā 4/1/1 Hetu etaṃ nidānaṃ esa samudayo esa paccayo jarāmaraṇassa, yadidaṃ jāti .pe. Saṅkhārānaṃ, yadidaṃ avijjā"ti evaṃ avijjādayo hetūti vuttā. Yathā dvādasa paccayā dvādasapaṭiccasamuppādāti.