idāni "evamiccādipāṭhassa, atthaṃ nānappakārato"ti evamādimātikāpada- saṅgahitatthappakāsanatthaṃ vuccate:- evanti ayaṃ saddo upamūpadesasampahaṃsanagarahaṇavacana- sampaṭiggahākāranidassanāvadhāraṇādīsu atthesu daṭṭhabbo. Tathāhesa "evaṃ jātena maccena, kattabbaṃ kusalaṃ bahun"ti evamādīsu upamāyaṃ dissati. "evante abhikkamitabbaṃ, evaṃ paṭikkamitabban"ti evamādīsu upadese. "evametaṃ bhagavā, evametaṃ sugatā"ti evamādīsu sampahaṃsane. "evameva panāyaṃ vasasī yasmiṃ vā tasmiṃ vā tassa muṇḍakassa samaṇakassa vaṇṇaṃ bhāsatī"ti evamādīsu garahaṇe. "evambhanteti kho te bhikkhū bhagavato paccassosun"ti evamādīsu vacanasampaṭiggahe. "evaṃ byā khohaṃ bhante bhagavatā dhammaṃ desitaṃ ājānāmī"ti evamādīsu ākāre. "ehi tvaṃ māṇavaka, yena samaṇo ānando tenupasaṅkami, upasaṅkamitvā mama vacanena samaṇaṃ ānandaṃ appābādhaṃ appātaṅkaṃ lahuṭṭhānaṃ balaṃ phāsuvihāraṃ puccha `subho māṇavo todeyyaputto bhavantaṃ ānandaṃ .pe. Phāsuvihāraṃ pucchatī'ti, evañca vadehi sādhu kira bhavaṃ ānando yena subhassa māṇavassa todeyyaputtassa nivesanaṃ, tenupasaṅkamatu anukampaṃ upādāyā"ti evamādīsu nidassane. "taṃ kiṃ maññatha kālāmā, ime dhammā kusalā vā akusalā vāti. Akusalā bhanteti. Sāvajjā vā anavajjā vāti. Sāvajjā bhanteti. Viññugarahitā vā viññupasaṭṭhā vāti. Viññugarahitā bhanteti. Samattā samādinnā ahitāya dukkhāya saṃvattanti no vā, kathaṃ vo ettha hotīti. Samattā bhante samādinnā ahitāya dukkhāya saṃvattanti, evaṃ no ettha hotī"ti evamādīsu avadhāraṇe. Idha pana ākāranidassanāvadhāraṇesu daṭṭhabbo.

Tattha ākāratthena evaṃsaddena etamatthaṃ dīpeti:- nānānayanipuṇamanekajjhāsaya- samuṭṭhānamatthabyañjanasampannaṃ vividhapāṭihāriyaṃ dhammatthadesanāpaṭivedhagambhīraṃ

@4 saṃ. sagā. 15/187/192 5 Ma. mū. 12/1/1 6 Ma. mū. 12/398/356