Ayampi udāno vutto bhagavatā iti me sutanti ayaṃ pāsi kesuciyeva potthathesu dissati. Tattha ayampiti pisaddo "idampi buddhe ratanaṃ paṇītaṃ, ayampi pārājiko hotī"tiādīsu viya sampiṇḍanattho, tena uparimaṃ sampiṇḍeti. Vuttoti ayaṃ vuttasaddo kesohāraṇavappanavāpasamīkaraṇajīvitavuttipamuttabhāvapāvacanavasena pavattanaajjhenakathanādīsu dissati. Tathāhesa "kāpaṭiko māṇavo daharo vuttasiro"tiādīsu kesohāraṇe āgato.

"gāvo tassa pajāyanti khette vuttaṃ virūhati

vuttānaṃ phalamasnāti yo mittānaṃ na dubbhatī"ti ādīsu vappane. "no ca kho paṭivuttan"tiādīsu aṭṭhadantakādīhi vāpasamīkaraṇe. "pannalomo paradattavutto migabhūtena cetasā viharāmī"tiādīsu jīvitavuttiyaṃ.