@7 cha.Ma., i. tenupasaṅkama 8 dī. Sī. 9/445/197 9 aṃ. tika. 20/66/185 Sabbasattānaṃ sakasakabhāsānurūpato sotapathamāgacchantaṃ tassa bhagavato vacanaṃ sabbappakārena ko samattho viññātuṃ, sabbathāmena pana sotukāmataṃ janetvāpi evamme sutaṃ, mayāpi ekenākārena sutanti.

Nidassanatthena "nāhaṃ sayambhū, na mayā idaṃ sacchikatan"ti attānaṃ parimocento "evamme sutaṃ, mayā evaṃ sutan"ti idāni vattabbaṃ sakalasuttaṃ nidasseti.

Avadhāraṇatthena "etadaggaṃ bhikkhave mama sāvakānaṃ bhikkhūnaṃ bahussutānaṃ yadidaṃ ānando, gatimantānaṃ, satimantānaṃ, dhitimantānaṃ, upaṭṭhākānaṃ yadidaṃ ānando"ti evaṃ bhagavatā pasaṭṭhabhāvānurūpaṃ attano dhāraṇabalaṃ dassento sattānaṃ sotukamyataṃ janeti "evamme sutaṃ, tañca kho atthato vā byañjanato vā anūnamanadhikaṃ, evameva, na aññathā daṭṭhabban"ti.

Mesaddo tīsu atthesu dissati. Tathāhissa "gāthābhigītaṃ me abhojaneyyan"ti evamādīsu mayāti attho. "sādhu me bhante bhagavā saṅkhittena dhammaṃ desetū"ti evamādīsu mayhanti attho. "dhammadāyādā me bhikkhave bhavathā"ti evamādīsu mamāti attho. Idha pana "mayā sutana"ti ca "mama sutan"ti ca atthadvaye vattati.