Mahākassapoti mahantehi sīlakkhandhādīhi samannāgatattā mahanto kassapoti mahākassapo, apica kumārakassapattheraṃ upādāya ayaṃ mahāthero "mahākassapo"ti vuccati. Pipphaliguhāyanti tasmā kira guhāya dvārasamīpe eko pipphalirukkho ahosi, tena sā "pipphaliguhā"ti paññāyittha. Tassaṃ pipphaliguhāyaṃ.

Dukkhitoti kāyasannissitaṃ dukkhaṃ sañjātaṃ etassāti dukkhito, dukkhappattoti attho. Bāḷhagilānoti adhimattagelañño, taṃ pana gelaññaṃ sato sampajāno hutvā adhivāseti. Athassa bhagavā taṃ pavuttiṃ ñatvā tattha gantvā bojjhaṅgaparittaṃ abhāsi, teneva therassa so ābādho vūpasami. Vuttañhetaṃ bojjhaṅgasaṃyutte:-

"tena kho pana samayena āyasmā mahākassapo

pipphaliguhāyaṃ viharati ābādhiko dukkhito bāḷhagilāno. Athakho bhagavā