9. Jaṭilasuttavaṇṇanā

[9] Navame gayāyanti ettha gayāti gāmopi titthampi vuccati. Gayāgāmassa hi avidūre viharanto bhagavā "gayāyaṃ viharatī"ti vuccati, tathā gayātitthassa. Gayātitthanti hi gayāgāmassa avidūre ekā pokkharaṇī atthi nadīpi, tadubhayaṃ "pāpapavāhanatitthan"ti lokiyamahājano samudācarati. Gayāsīseti gajasīsasadisasikharo tattha eko pabbato gayāsīsanāmako, yattha hatthikumbhasadiso piṭṭhipāsāṇo bhikkhusahassassa okāso pahoti, tatra bhagavā viharati. Tena vuttaṃ "gayāyaṃ viharati gayāsīse"ti.

Jaṭilāti tāpasā. Te hi jaṭādhāritāya idha "jaṭilā"ti vuttā. Antaraṭṭhake himapātasamayeti hemantassa utuno abbhantarabhūte māghamāsassa avasāne cattāro, phagguṇamāsassa ādimhi cattāroti aṭṭhadivasaparimāṇe himapātanakāle. Gayāyaṃ ummujjantīti keci tasmiṃ titthasammate udake paṭhamaṃ nimuggasakalasarīrā tato ummujjanti vuṭṭhahanti uppilavanti. Nimmujjantīti sasīsaṃ udake osīdanti. Ummujjanimmujjampi karontīti punappunaṃ ummujjananimmujjanānipi karonti.