Tattha hi keci "ekummujjaneneva pāpasuddhi hotī"ti evaṃdiṭṭhikā, te ummujjanameva katvā gacchanti. Ummujjanaṃ pana nimmujjanamantarena natthīti avinābhāvato nimmujjanampi te karontiyeva. Yepi "ekanimmujjaneneva pāpasuddhi hotī"ti evaṃdiṭṭhikā, tepi ekavārameva nimmujjitvā vuttanayena avinābhāvato ummujjanampi katvā pakkamanti. Ye pana "tasmiṃ titthe nimmujjaneneva pāpasuddhi hotī"ti evaṃdiṭṭhikā, te tattha nimmujjitvā assāse sannirumbhitvā maruppapātapatitā viya tattheva jīvitakkhayaṃ pāpuṇanti. Apare "punappunaṃ ummujjananimmujjanāni katvā nhāte pāpasuddhi hotī"ti evaṃdiṭṭhikā, te kālena kālaṃ ummujjananimmujjanāni karonti. Te sabbepi sandhāya vuttaṃ "ummujjantipi nimmujjantipi ummujjanimmujjampi karontī"ti. Ettha ca kiñcāpi nimmujjanapubbakaṃ ummujjanaṃ, nimmujjanameva pana karontā katipayā, ummujjanaṃ tadubhayañca karontā bahūti tesaṃ yebhuyyabhāvadassanatthaṃ ummujjanaṃ paṭhamaṃ vuttaṃ. Tathā sambahulā jaṭilāti jaṭilānaṃ yebhuyyatāya vuttaṃ, muṇḍasikhaṇḍinopi ca brāhmaṇā udakasuddhikā tasmiṃ kāle tattha tathā karonti.

@3 ka. ummujjananimmujjanampi, khu.u. 25/9/10

Osiñcantīti keci gayāya udakaṃ hatthena gahetvā attano sīse ca sarīre ca osiñcanti, apare ghaṭehi udakaṃ gahetvā tīre ṭhatvā tathā karonti. Aggiṃ juhantīti keci gayātīre vediṃ sajjetvā dhūmadabbipūjādike upakaraṇe upanetvā aggihutaṃ juhanti aggihutaṃ paricaranti. Iminā suddhīti iminā gayāyaṃ ummujjanādinā aggiparicaraṇena ca pāpamalato suddhi pāpapavāhanā saṃsārasuddhi eva vā hotīti evaṃdiṭṭhikā hutvāti attho.