Tattha na udakena suci hotīti ettha udakenāti udakummujjanādinā. Udakummujjanādi hi idha uttarapadalopena "udakan"ti vuttaṃ yathā rūpabhavo rūpanti. Athavā udakenāti ummujjanādikiriyāya sādhanabhūtena udakena suci sattassa suddhi nāma na hoti, natthīti attho. Athavā sucīti tena yathāvuttena udakena suci pāpamalato suddho nāma satto na hoti. Kasmā? bahvettha nhāyatī jano. Yadi hi udakorohanādinā yathāvuttena pāpasuddhi nāma siyā, bahu ettha udake jano nhāyati, mātughātādipāpakammakārī añño ca gomahiṃsādiko antamaso macchakacchape upādāya, tassa sabbassāpi pāpasuddhi siyā, na panevaṃ hoti. Kasmā? nhānassa pāpahetūnaṃ appaṭipakkhabhāvato. Yaṃ hi yaṃ vināseti, so tassa paṭipakkho yathā āloko andhakārassa, vijjā ca avijjāya, na evaṃ nhānaṃ pāpassa. Tasmā niṭṭhamettha gantabbaṃ "na udakena suci hotī"ti.

Yena pana suci hoti, taṃ dassetuṃ "yamhi saccañcā"tiādimāha. Tattha yamhīti yasmiṃ puggale. Saccanti vacīsaccañceva viratisaccañca. athavā saccanti ñāṇasaccañceva paramatthasaccañca. Dhammoti ariyamaggadhammo phaladhammo ca, so sabbopi yasmiṃ puggale upalabbhati, so suci so ca brāhmaṇoti so ariyapuggalo visesato khīṇāsavo accantasuddhiyā suci ca brāhmaṇo cāti. Kasmā panettha saccaṃ dhammato visuṃ katvā gahitaṃ? saccassa bahūpakārattā. Tathā Hi "saccaṃ ve amatā vācā. Saccaṃ have sādhutaraṃ rasānaṃ, sacce atthe ca dhamme ca, āhu santo patiṭṭhitā. Sacce ṭhitā samaṇabrāhmaṇā cā"tiādinā anekesu suttapadesu saccaguṇā pakāsitā. Saccavipariyassa ca "ekaṃ dhammaṃ

@3 khu.jā. 28/358/140 (syā) Atītassa, musāvādissa jantuno. Abhūtavādī nirayaṃ upetī"ti ca ādinā pakāsitāti.