Ekanti gaṇanaparicchedaniddeso. Samayanti paricchinnaniddeso. Ekaṃ samayanti aniyamitaparidīpanaṃ. Tattha samayasaddo:-

samavāye khaṇe kāle samūhe hetudiṭṭhisu

paṭilābhe pahāne ca paṭivedhe ca dissati.

Tathā hissa "appevanāma svepi upasaṅkameyyāma kālañca samayañca upādāyā"ti evamādīsu samavāyo attho. "ekova kho bhikkhave khaṇo ca samayo ca brahmacariyavāsāyā"ti evamādīsu khaṇo. "uṇhasamayo pariḷāhasamayo"ti evamādīsu kālo. "mahāsamayo pavanasmin"ti evamādīsu samūho. "samayopi kho te bhaddāli appaṭividdho ahosi, bhagavāpi kho sāvatthiyaṃ viharati, sopi maṃ jānissati `bhaddali nāma bhikkhu satthu sāsane sikkhāya aparipūrikārī'ti ayampikho te bhaddāli samayo appaṭividdho ahosī"ti evamādīsu hetu. "tena kho pana samayena uggāhamāno paribbājako samaṇamuṇḍikāputto samayappavādake tiṇḍukācīre ekasālake mallikāya ārāme paṭivasatī"ti evamādīsu diṭṭhi.