Etthaha:- "yadi tāva bhagavā sāvatthiyaṃ viharati, `jetavane anāthapiṇḍikassā- rāme'ti na vattabbaṃ, atha tattha viharati, `sāvatthiyan'ti na vattabbaṃ. Na hi sakkā ubhayattha ekaṃ samayaṃ viharitun"ti. Vuccate:- nanu vuttametaṃ "samīpatthe bhummavacanan"ti, yato yathā gaṅgāyamunādīnaṃ samīpe goyūthāni carantāni "gaṅgāya caranti, yamunāya carantī"ti vuccanti, evamidhāpi yadidaṃ sāvatthiyā samīpe jetassa vanaṃ anāthapiṇḍikassa ca ārāmo, tattha viharanto vuccati "tasmā sāvatthiyaṃ viharati jetavane anāthapiṇḍikassārāme"ti attho veditabbo. Gocaragāmanidassanatthaṃ hissa sāvatthīvacanaṃ, pabbajitānurūpanivāsanaṭṭhānanidassanatthaṃ sesavacanaṃ.

@5 cha.Ma. parikittane 6 cha.Ma. pucchāniyāmakaraṇaṃ 7 cha.Ma., i. ayaṃ saddo na dissati

Tattha sāvatthīkittanena bhagavato gahaṭṭhānuggahakaraṇaṃ dasseti, jetavanādikittanena pabbajitānuggahakaraṇaṃ. Tathā purimena paccayagahaṇato attakilamathānuyogavivajjanaṃ, pacchimena vatthukāmappahānato kāmasukhallikānuyogavivajjanupāyadassanaṃ. Purimena ca dhammadesanābhiyogaṃ, pacchimena vivekādhimuttiṃ. Purimena karuṇāya upagamanaṃ, pacchimena paññāya upagamanaṃ. Purimena sattānaṃ hitasukhanipphādanādhimuttataṃ, pacchimena parahitasukhakaraṇe nirupalepataṃ. Purimena dhammikasukhapariccāganimittaphāsuvihāraṃ, pacchimena uttarimanussadhammānuyoganimittaṃ. Purimena manussānaṃ upakārabahulataṃ, pacchimena devānaṃ. Purimena loke jātassa loke saṃvaḍḍhabhāvaṃ, pacchimena lokena anupalittatanti evamādi attho.