@3 Ma.mū. 12/503/445 Dasa lokā dasāyatanāni, dvādasa lokā dvādasāyatanāni, aṭṭhārasa lokā aṭṭhārasa dhātuyo"tiādīsu saṅkhāraloko. "sassato loko, asassato loko"ti ādīsu sattaloko vutto. Idhāpi sattaloko veditabbo.

Tattha lokīyati vicittākārato dissatīti cakkavāḷasaṅkhāto loko okāsaloko, saṅkhāro lujjati palujjatīti loko, lokīyati ettha puññapāpaṃ tabbipāko cāti sattaloko. Tesu bhagavā mahākaruṇāya anukampamāno saṃsāradukkhato mocetukāmo sattalokaṃ olokesi. Katamassa pana sattāhassa accayena olokesi? paṭhamassa sattāhassa. Bhagavā hi pallaṅkasattāhassa pariyosāne pacchimayāmāvasāne "yadā have pātubhavanti dhammā .pe. Sūriyova obhāsayamantalikkhan"ti imaṃ ariyamaggānubhāvadīpakaṃ udānaṃ udānetvā "ahaṃ tāva evaṃ suduttaraṃ saṃsāramahoghaṃ imāya dhammanāvāya samuttaritvā nibbānapāre ṭhito, handa dāni lokampi tāressāmi, kīdiso nu kho loko"ti lokaṃ volokesi. Taṃ sandhāya vuttaṃ "atha kho bhagavā tassa sattāhassa accayena tamhā samādhimhā vuṭṭhahitvā buddhacakkhunā lokaṃ volokesī"ti

tattha volokesīti vividhehi ākārehi passi, hatthatale ṭhapitaāmalakaṃ viya attano ñāṇena paccakkhaṃ akāsi. Anekehi santāpehītiādi volokitākāradassanaṃ. Anekehi santāpehīti anekehi dukkhehi. Dukkhaṃ hi santāpanapīḷanaṭṭhena santāpoti vuccati. Yathāha "dukkhassa pīḷanaṭṭho saṅkhataṭṭho santāpaṭṭho vipariṇāmaṭṭho"ti. Tañca dukkhaṃ dukkhādivasena ceva jātiādivasena ca anekappakāraṃ. Tena vuttaṃ "anekehi santāpehī"ti anekehi dukkhehi santappamāne pīḷiyamāne bādhiyamāne.